DVG ta alerta, aumento den uzo di medicamento pa baha peso

DVG como e instancia cu ta apunta pa promove salud general y preveni malesanan, a tuma nota di un alerta epidemiologico emiti pa Organizacion Panamericana di Salud (PAHO/WHO) tocante e uzo indebido di e tipo di medicamentonan aki .

E medicamentonan aki principalmente ta pa trata diabetes tipo 2 y, den algun caso specifico, obesidad cu complicacionnan medico. Sin embargo, nan uzo mester tuma lugar exclusivamente bou supervision medico, cu prescripcion di un doctor y basa riba evaluacion individual di cada pashent .

DVG ta preocupa cu:

• Ta uza e medicamentonan sin prescripcion y puramente pa baha peso
• Tin aumento den compra via canalnan no oficial, manera online of importacion ilegal

Segun PAHO/WHO, e uzo incorecto por causa efecto secundario serio, manera:

• Inflamacion di pancreas (pancreatitis)
• Probleman cu vesicula biliar
• Bloqueo di tripa
• Complicacionnan adicional cu ainda ta den investigacion 

Compra di e medicamentonan aki via canalnan no oficial (ilegal) ta aumenta e riesgo cu e producto por ta falso, contamina of no a ward’e den condicionnan corecto, poniendo bo salud y bo bida na peligro .

DVG ta haci un yamada na comunidad

• No uza medicamento pa baha peso sin conseho medico
• No cumpra producto via canal informal of online (ilegal)
• Consulta semper cu un profesional di salud prome cu uza cualkier tipo di medicina 

DVG lo sigui monitorea e situacion y ta haci un yamada na comunidad pa tuma decisionnan bon informa, consciente y responsabel ora ta trata di nan salud.