Drone policial cu tecnologia avansa ta drenta den funcion na KPA
ORANJESTAD - Criminalidad no ta para keto y Cuerpo Policial di Aruba (KPA) tampoco!
Cuerpo Policial Aruba ta sigi crece por medio di colaboracion, innovacion y modernisacion riba e parti efectivo y eficiente pa combati criminalidad.
Despues diferente pasonan importante den e parti digitalisacion durante e ultimo añanan, a yega e momento pa eleva KPA cu mas ekipo moderno y sofistica. KPA ta adkiri un drone policial specialisa y ta cuadra cu e futuro di innovacion di nan organisacion riba un nivel internacional bon ekipa. Cu sensornan, camera y opcionnan sofistica di ultimo version di e compania mas grandi y renombra cu ta DJI.
Combatiendo criminalidad den un forma profesional y den un otro bista uzando ekiponan moderno cu ta haci e trabou di Polis mas eficiente. Tambe ta yuda pa investigacion, orden publico y mucho mas den nos operacionnan diario.
Cuatro colega di KPA conhuntamente cu personal di Setar N.V. a sigui un curso hopi intensivo di “Theoretical and Practical Drone Flight Course- Enterprise Line.
G.J. Luna – DJI instructor y M. M. Zuniga – DJI engineer di Drones Empresariales de Centroamérica S.A. a duna e curso.
Na final di e curso a duna un presentacion na alto mando di KPA y como tambe director y representante di Setar NV.
KPA ta felicita e coleganan di KPA y como tambe di Setar NV pa a pasa e curso aki cu exito. Nos ta keda traha pa mehora e parti di siguridad di nos Pais cu introduccion di tecnologia avansa.