DIMAS ta recorda tur persona cu tin permiso: controla bo permiso prome cu biaha
ORANJESTAD - Departamento di Integracion, Maneho y Admision di Stranhero (DIMAS) ta recorda tur residente cu tin un permiso di estadia pa verifica cu nan permiso ta ainda valido prome cu nan sali bay di biahe.
Si bo permiso ta bay caduca of a caduca caba, ta importante pa entrega e peticion pa renobacion na tempo.
Peticion pa renobacion y pago
Por haci esaki facilmente durante orario di oficina via e formulario online di DIMAS. Despues di entrega e peticion, lo manda e orden di pago na e e-mail registra den e peticion. Por haci e pago online via Bill Payment of na un oficina auxiliar di impuesto na MFA pero tambe na e kioskonan di pago na Dimas y MFA Savaneta.
Ki ora mester di carta di Re-entry?
DIMAS ta enfatisa cu no ta necesario solicita un carta di Re-entry si e permiso di estadia ta ainda valido durante e biahe. Si pa trankilidad ta desea toch e carta di re-entrada, por pidi esaki tambe.
Por solicita un carta di Re-entry den caso cu bo tin un peticion pa prolongacion di permiso den tramite of, den situacionnan specifico, si bo tin un permiso valido y mester e documento.
Con ta solicita un carta di Re-entry?
E solicitante mester:
- Download, print y yena e formulario Aanvraagformulier Bewijs voor Terugkeer;
- Hiba e formulario na un oficina di MFA y paga Afl. 40,- na bali di Departamento di Impuesto;
- Scan e comprobante di pago;
- Yena e formulario online Bewijs van Terugkeer y upload e comprobante di pago hunto cu tur documento rekeri.
Aviso importante di DIMAS:
DIMAS a nota cu regularmente tin cliente ta solicita un carta di Re-entry riba e dia cu nan ta regresa Aruba. Esaki por crea inconveniencia durante e proceso di regreso. Pa e motibo aki DIMAS ta conseha tur solicitante pa entrega nan peticion na tempo, mirando cu esaki ta tuma minimo un siman pa procesa, semper y cuando cu a entrega tur documento y cumpli cu tur rekisito.
