Digitalisando Sector di Cuido.
ORANJESTAD - Recientemente Minister di Turismo y Salud Publico Dangui Oduber a anuncia cu lo bay digitalisa sector di cuido haciendo uzo di e plataforma Aruba Health App.
Diabierna 8 di maart 2024, Ministerio di Salud Publico hunto cu AZV a haya presentacion di Setar NV riba e avancenan di e proyecto. Pronto e asegurado lo nota cambionan positivo riba su Health App personal. SETAR ta trahando riba un sistema sigura di cita pa e asegurado y su dokter di cas. E asegurado lo haya e opcion di contesta algun pregunta via su app y asina dependiendo di e urgencia, lo ricibi un contesta con pa sigui y si ta necesario lo ricibi opcion pa reserva su cita riba e dia y orario disponibel.
Ademas SETAR ta inventarisando con, por medio di digitalisacion, por yuda otro instancianan den sector di cuido manera specialistanan y Stichting Bob.
Ta trahando duro pa logra introduci e cambio aki pa tur asegurado, mirando e necesidad di mehora cuido medico mas ainda.
Otro funcionnan cu ta trahanando riba dje ta entre otro: traha afspraak cu dokter of
specialista, historia medico di e asegurado, busca receta y varios otro funcion.
Digitalisacion di cuido medico na Aruba lo resulta den beneficionan pa comunidad y contribui na mehora demas servicionan medico y calidad di cuido. Ademas e ta haci e trabao di dokternan di cas mas eficiente, transparente y rapido. E sistema innovativo aki lo duna e asegurado acceso na su informacion medico y duna nan mas control di nan salud y calidad di bida.