Dianan di calor intenso, cuida bo mes y cuida otro

ORANJESTAD - Durante dianan di calor intenso, nos tur mester tuma precaucion. 

Calor extremo no ta solamente incomodo, e por afecta nos salud y den caso severo por conduci na un atake di calor (heatstroke), cu ta un emergencia medico.

P’esey Departamento di Salud Publico (DVG) ta haci un yamada na comunidad: Proteha bo mes, pero tira bista pa otro tambe, specialmente esnan mas vulnerabel.

MUCHANAN NA SCOL

Durante oranan mas calor, specialmente entre 11am pa 3pm, scolnan ta recomenda pa limita actividad fisico intenso pafo. Percura pa muchanan tin suficiente awa disponibel durante henter dia y crea oportunidad pa nan permanece of haci actividad den un luga fresco y cu sombra. Muchanan no semper ta reconoce of bisa cu calor ta afectando nan, p’esey supervision ta importante.

ADULTONAN MAYOR

Adultonan mayor ta mas vulnerabel pa deshidratacion y complicacion relaciona cu calor. Famia y dunadonan di cuido, tira bista regularmente pa nan. Percura pa nan bebe suficiente awa, bisti paña liviano y permanece den un ambiente fresco durante e oranan mas calor. No warda te ora nan pidi awa pa ofrece nan algo pa bebe.

ESNAN CU TA TRAHA PAFO

Trahadonan den construccion, mantencion y otro trabou pafo ta exponi na calor durante hopi ora. P'esey bebe awa regularmente, tuma pausa den sombra of den un lugar fresco, proteha cabes y curpa cu paña adecuado ta necesario. Coleganan, tira bista pa otro, pasobra confusion of cambio di comportamiento por ta señal cu calor ta afectando un persona seriamente.

DEPORTISTANAN

Evita entrenamento y actividad fisico intenso entre 11am y 3pm. Preferiblemente train mainta trempan of mas laat den atardi. Si bo sinti mareo, debilidad, nausea, dolor di cabes of bo ta sinti bo curpa demasiado cayente, para actividad y busca un luga fresco.

NOS BESTIANAN TAMBE TA SINTI CALOR

Percura pa bestia tin awa fresco y sombra semper disponibel. Evita actividad intenso durante oranan mas calor y nunca laga un bestia sera den auto, ni sikiera pa algun minuut.

RECONOCE E SEÑALNAN DI ALERTA

Sodamento excesivo, dolor di cabes, mareo, debilidad, calambre, nausea of sacamento por ta señal cu calor ta afectando e curpa.

Saca e persona for di solo.

Hib’e na un luga fresco of den sombra.

Lag'e sosega y cuminsa fria su curpa.

Dun'e awa poco-poco si e ta completamente consciente.

ATAKE DI CALOR (HEATSTROKE) TA UN EMERGENCIA MEDICO

Si e persona ta confundi of desorienta, perde conocemento, haya atake di calor, tin su curpa extremadamente cayente of su condicion ta empeora rapidamente, busca asistencia medico di emergencia inmediatamente. Mientras asistencia ta na caminda, sigui purba di baha e temperatura di e persona.

Calor intenso ta algo cu nos mester tuma na serio. Un tiki atencion por evita un emergencia. Cuida bo mes, cuida bo famia, tira bista pa bo colega, bo bisiña y esnan mas vulnerabel rond di bo.

Pa keda semper informa:

Dianan di calor intenso, cuida bo mes y cuida otro