Dia Mundial di Turismo ta enfoka riba turismo responsibel y sostenibel
ORANJESTAD –Diaberna 27 di september, Aruba Tourism Authority (ATA), a celebra “Dia Mundial di Turismo” conhuntamente cu partnernan y profesionalnan cu ta traha den turismo.
Pa cu e celebracion aki, Minister di Turismo Dangui Oduber a duna un discurso den cual a indica cu turismo na Aruba no ta solamente stimula nos economia, pero ta contribui di un manera significante na e bienestar social di Aruba. E ingreso genera di turismo ta yuda sostene e sectornan importante manera e sector di cuido y fondo di pensioen, sigurando cu comunidad tambe tin beneficio di esaki.
E maneho di Ministerio di Turismo ta basa riba:
- Trece turista afluente y di calidad;
- Crece Aruba cu un turismo sostenibel y responsabel;
- Diversifica nos turismo innovando producto Aruba;
- Haci inversionan continuo den mehoracion di producto Aruba.
Hunto mester traha pa preserva Aruba su paisahenan, tradicionnan y expresion cultural cu ta haci Aruba un destinacion unico. Adoptando un maneho di turismo sostenibel, nos ta proteha nos isla pa generacionnan cu ta bin, pero tambe eleva e calidad di bida di tur cu ta biba na Aruba.