Dia Mundial di Medio Ambiente 2025

Aruba cu ta un isla cu ta depende hopi riba turismo mester ta mas consciente di e efecto cu plastic tin riba nos recurso natural cu ta pone nos economia drey. Pa e motibo ey Directie Natuur en Millieu, DNM, a uni su mes na e programa di Nacionnan Uni pa enfatisa e urgencia cu tin pa combati polucion causa pa uzo di plastic. Riba e dia di awe, Dia Mundial di Medio Ambiente, DNM ta comparti algun tips cu cada un di nos por aplica den nos bida diario pa contribui na restauracion di Aruba su medio ambiente.

1. Reduci uzo di plastic di un solo uzo. Opta pa productonan reuzabel manera tas di compra.
2. Participa na of organisa un evento di limpiesa na beach, den bario, entre bisiñanan etc.
3. Evita ‘take out’, come na cas, prepara bo propio cuminda.
4. Spaar awa. Por ehempel, uza e awa di airco pa muha mata.
5. Planta mata y cuida vegetacion tur caminda. Contribui na aumenta e matanan rond di nos y den nos mondinan. Asina tambe ta mehora e calidad di nos suela. Nos ta pidi pa evita e mata Neem ya cu esaki ta un mata invasor agresivo. E ta caba cu e matanan cu ta endemico na nos naturalesa.
6. Sostene actividad local di conservacion. Duna sosten na organisacionnan cu ta traha pa proteha nos naturalesa.
7. Promove reciclahe. Duna un articulo bieu/cu bo no ta uza mas un uzo nobo. Separa desperdicio pa sostene programanan di reciclahe.