Dhaddy y Tony reconoci como baluarte nacional
ORANJESTAD - Durante e recien concierto di Dhaddy Brokke y Tony Sherman como duo, Prome Minister mr. Mike Eman, den su capacidad como minister di cultura, a rindi homenahe na e duo aki.
Nan a presenta nan exitonan nostalgico cu pa decadas a zona den mayoria hogar den Antiyas Hulandes durante e anochi special aki, cu ademas tabata e ultimo oportunidad pa goza di e duo aki den concierto. Publico a sa di respalda nan grandemente y hunto cu nan a canta e cancionnan cu mayoria a lanta cu nan durante nan infancia.
No ta facil pa organisa un evento asina grandi mirando cu ambos cantante tin nan agenda yena cu presentacion. Pa reconoce e exitonan grandi di e duo aki, Prome Minister Eman a duna Dhaddy y Tony un plakaat bon mereci pa nan produccionnan cu a sa di alegra curason di e comunidad Antiyano cu cancionnan di Pasco, dia di mama y baladanan inolvidabel. Cu e plakaat aki, Gobierno a reconoce Dhaddy y Tony como baluarte nacional y a desea pa wak mas di ambos artista hunto den futuro.
"Dhaddy y Tony por wordo considera como parti di e alma y curason di e pais aki", Prome Minister Eman a bisa den su discurso.
