Detenidonan na KIA lo ricibi curso di barberia

Pa algun tempo caba ta ofrece un variedad di programa den forma di curso, na detenido pa yuda nan cu nan reintegracion den comunidad na momento cu nan bandona KIA. E cursonan duna ta basa netamente riba deseo di e propio detenidonan, pa asina aumenta e grado di participacion y exito.

Mirando e demanda grandi cerca e detenidonan, pa e curso di barberia, a acerca sr. Lambrinos
di Lambrinos barbershop, pa duna un seminario di tres dia pa siña e grupo di detenido interesa, kico ta come y bebe den e mundo di barberia. Mirando e entusiasmo di e detenidonan, awo lo bay duna e curso mes. Cu tipo di curso asina, e detenidonan lo conoce e profesion miho y lo haya experencia, pa asina na momento cu nan sali for di KIA, nan por drenta e mercado laboral di biaha. Un persona cu tin un trabou cu e ta gusta, lo ta motiva y dificilmente lo bolbe riba caminda robes.

Minister di Husticia y Asunto Social Rocco Tjon tawata presente na KIA pa asina presencia un seminario di barberia y a manda palabranan di pabien na henter e ekipo di KIA cu a haci esaki posibel, na señor Lambrinos cu a brinda e seminario aki di tres dia largo, como tambe na e participantenan.