Den 2025 FreeZone Aruba ta bolbe haci ganashi pa di dos aña, despues di añanan di perdida

Minister di Finansa, Asunto Economico y Sector Primario Geoffrey Wever, den su capacidad como representante di Land Aruba como unico accionista di FreeZone Aruba NV, a reuni cu Director Walter Mosher y e Raad van Commissarissen di FreeZone Aruba NV pa e ‘Algemene Vergadering van Aandeelhouders’, durante cual e Minister a aproba e cuenta annual pa aña financiero 2025.

E aprobacion ta representa un paso importante den e proceso di reorganisacion y profesionalisacion cu FreeZone Aruba NV a pasa aden durante e ultimo añanan. A instala un Raad van Commissarissen profesional nobo y, na februari 2026, Sr. Walter Mosher a inicia como Director nobo di FreeZone Aruba NV.

Pa varios aña, FreeZone Aruba NV tabatin un atraso considerabel den su aprobaccion di cuentanan anual (jaarrekening). Como parti di e reorganisacion, e organisacion a traha duro pa percura cu FreeZone Aruba y gobierno ta completa un trayectoria largo pa logra trece e aprobacion di e cuentanan anual al dia, despues di varios aña di retraso den e aprobacion di e cuenta anual.

Awor, cu e cuenta anual di 2025 completa y aproba, FreeZone Aruba NV ta completamente al dia cu su aprobacion di e cuentanan anual.

E cuenta anual di 2025 ta mustra un resultado positivo, cu Afl. 2,0442,222 na entrada, mientras cu gastonan operacional a conoce un reduccion significante. Ademas, e auditor externo a emiti un ‘goedkeurende verklaring’ riba e cuenta anual. Na maart 2026, FreeZone Aruba NV a anuncia un ganashi preliminar di Afl. 482.000 pa 2025; e cuenta anual aproba awor ta formalisa e resultado financiero di e aña cu Afl 484.305 den ganashi.

E resultado di 2025 ta specialmente significativo ora compara esaki cu e situacion di algun aña pasa. Despues di varios aña di perdida, FreeZone Aruba NV, casi bancarota, awor a logra su prome resultado positivo na 2024. E resultado di 2025 ta confirma un di dos aña consecutivo cu ganashi, un señal cu e cambionan structural cu a implementa y pasonan concreto cu a tuma, ta produciendo resultado real. 

Minister Wever ta considera e desaroyo aki un logro importante, no solamente pa FreeZone Aruba NV, sino tambe den e esfuerso mas amplio pa fortalece y diversifica economia di Aruba.

“Dos aña pasa nos tabata para dilanti di un organisacion cu un atraso di hopi aña den su aprobacion di cuentanan anual y cu tabata enfrenta perdida grave, na e punto di bancarota. Awe, nos por mira un FreeZone Aruba NV cu su administracion financiero na ordo, cu dos aña consecutivo di resultado positivo cu ganashi y cu un direccion cla pa futuro. Esaki ta resultado di hopi trabou y esfuerso, y mi kier gradici Raad van Commissarissen, Director y henter e team di FreeZone Aruba NV pa nan compromiso durante e proceso aki y cu hunto, a realisa e logro grandi aki.”

E saneamento financiero y administrativo ta solamente un parti di e transformacion. FreeZone Aruba NV ta preparando varios siguiente paso pa sigui modernisa y fortalece su posicion como instrumento di Aruba pa atrae y stimula inversion y actividad economico nobo. 

Na mes momento, tin movimiento concreto den atrae actividad comercial nobo. Actualmente, tin varios empresa nobo den proceso pa establece nan mes den e FreeZone den e lunanan binidero.

E desaroyonan ta sigui riba e rumbo cu Gobierno y FreeZone Aruba NV a inicia cu introduccion di e Landsbesluit Toegestane Dienstverlenende Activiteiten cu introduci e ana aki, cu tin como meta pa reposiciona FreeZone Aruba NV, atrae inversion y diversificacion economico.

“Nos a pone e fundeshi na ordo. Awor e siguiente fase ta pa sigui construi riba dje. Tin hopi movimiento y varios desaroyo importante riba caminda pa FreeZone Aruba NV. E meta ta pa crea un FreeZone moderno y competitivo cu por contribui activamente na diversificacion di nos economia y crea oportunidad nobo pa Aruba,” Minister Wever a finalisa.