Delegacion FECC Germany di bishita cerca Prome Minister pa fortalece cooperacion cultural
ORANJESTAD – Riba 20 di januari, Prome Minister Mike Eman, den su capacidad como Ministro di Cultura, a ricibi un delegacion di Federation of European Carnival Cities (FECC) Germany, cu actualmente ta di bishita na Aruba den marco di un intercambio cultural oficial.
E bishita ta forma parti di cooperacion internacional dentro di red global di carnaval, mirando cu SMAC ta awor un miembro activo di FECC. Durante nan estadia na Aruba, e delegacion a asisti na tres di nos paradanan di Carnaval, obteniendo experiencia directo riba organisacion, participacion comunitario y impacto cultural di nos celebracion nacional.
Durante e encuentro cu Prome Minister, a enfatisa e balor di Carnaval como un di e actividadnan cultural mas importante di Aruba, no solamente den termino di tradicion y identidad, pero tambe den su impacto economico y turistico.
E reunion a sirbi como un oportunidad pa reafirma compromiso di Aruba cu diplomacia cultural y cooperacion internacional. Tambe a resalta e potencial pa amplia colaboracion dentro di red internacional di Carnaval, fortaleciendo posicion di Aruba den escenario cultural global.
E gesto di reconocimiento oficial a subraya apoyo continuo di gobierno pa desaroyo strategico di sector cultural di Aruba.
