Delegacion di Gihae Tang Soo Do Aruba cu 50 medaya den Campeonato Mundial
ORANJESTAD - Recientemente, un delegacion di Gihae Tang Soo Do Aruba, a competi den e World Tang Soo Do Association World Championship cu a tuma lugar na Greensboro North Carolina, Merca.
Den e campeonato mundial aki, e deportistanan di Aruba a logra gana 50 medaya; 23 di oro, 9 di silver y 18 di brons.
Un total di 1500 atleta di 36 pais, manera Argentina, Africa, Costa Rica, Chile, Ecuador, Merca, Mexico etc. a participa den diferente categoria di Tang Soo Do. Despues di 16 aña, Aruba a participa atrobe den e Competencia di Creatividad y a sali na di tres lugar. Pa participa den e competencia aki, a haci un precualificacion y solamente e ocho miho gruponan por a presenta na e campeonato mundial.
E atletanan di Aruba a duna un bunita presentacion di e historia di nos isla, resaltando nos indigenanan di Caquetio. Locual a sobresali di Aruba tabata cu tur atleta a participa den Competencia di Creatividad, incluyendo e atletanan di cuater (4) aña di edad. Ademas a pone un dushi ambiente, hibando musica di tambu en bibo pa nan presentancion.
Ministerio di Deporte ta gradici presidente di Tang Soo Do Federation y “head coach” di Gihae Tang Soo Do Aruba Sra. Melissa Noguera, entrenado- y mayornan cu a contribui den e triunfo di e atletanan aki y ta felicita e 44 karatekanan di Gihae Tang Soo Do Aruba cu a destaca den World Tang Soo Do Association World Championship.