Delegacion di Aruba ta sigui combersacionnan na Hulanda riba energia sostenibel
ORANJESTAD – Durante un bishita di trabou na Hulanda, Prome Minister Mike Eman a consulta cu expertonan riba e transicion energetico di Aruba.
E enfoke tabata riba e rumbo nobo di gobierno y e ehecucion di su vision pa haci e isla mas sostenibel.
Prome Minister Eman a combersa cu Joeri van Dun, un consehero di transicion energetico, entre otro. Van Dun a traha na TNO (Nederlandse Organisatie voor toegepast-natuurwetenschappelijk onderzoek) na Aruba entre 2014 y 2018 y tabata envolvi den diferente proyecto riba e isla y den region. TNO ta sigui hunga un rol clave den e transicion pa energia di biento y solo y ta sostene Aruba den reduccion di su dependencia di combustibel fosil.
Segun Van Dun, Aruba tin un potencial grandi pa logra metanan di sostenibilidad danki na su recursonan natural y avancenan tecnologico.
Alexandra Sizoo, un consehero huridico y specialista den transicion di energia, tambe a participa na e reunion. El’a enfatisa cu intercambio di conocemento entre Aruba y Hulanda ta di importancia mutuo y cu colaboracion den region di Caribe por contribui na un sistema di energia mas robusto y sostenibel.
Prome Minister Eman a expresa su satisfaccion cu e resultadonan di e combersacionnan y a reitera e compromiso di Aruba pa sigui construi un futuro mas berde y resiliente.