Delegacion comercial a sali pa Agroalimentaria 2025 na Republica Dominicana.

Conforme e Plan di Gobernacion 2025-2028 Gabinete AVP-Futuro y di acuerdo cu e vision di Ministerio di Finansa, Economia y Sector Primaria un prioridad ta pa baha e costo di bida na Aruba.

Esaki ta posibel door di mitiga e impacto di entre otro di aumento di prijs di producto importa di Merca.  Meta principal di atende Agroalimentaria 2025, un di e ferianan agricola mas importante di Caribe, cu lo tuma lugar di 28 te 31 di mei 2025 na Santo Domingo, Republica Dominicana ta pa explora expansion di importacion den region. 

E participacion oficial di Aruba lo ta bou liderazgo di Departamento di Asunto Economico, Comercio y Industria (DEZHI), den colaboracion estrecho cu e Consul y Vice-Consul di e Consulado General di Republica Dominicana na Aruba. Manera menciona un total di 30 comerciantenan Arubiano di diferente sector cu ta interesa especialmente den producto agrícola y bebiba a Sali  rumbo pa Agroalimentaria 2025. 

Na e feria e comerciantenan tin oportunidad di traha conexion directo cu negoshinan di Santo Domingo pa asina amplia nan contacto y lasonan den regio den e sector agricola. Lo tin rondanan di negoshi, reunionnan directo cu exportadonan Dominicano, conferencianan, presentacionnan relaciona cu e desaroyo actual y futuro di e sector agricola.

Asina aki e commerciante nan presente tin e oportunidad pa examina e productonan Dominicano personalmente, evalua nan calidad y asina explora posibel importacion pa Aruba. 

Ya caba for di 2018, DEACI a tuma un rol activo den coordinacion di diferente misionan comercial pa Santo Domingo y esaki lo continua di e mesun manera den e edicion di e aña aki. Cu sosten di gobierno Dominicano, a  estableci  un ruta maritimo nobo entre Republica Dominicana y Aruba via Don Andres, cu ta yuda facilita transportacion consolida di carga.