Cuerpo di Bombero lidera pa un Ekipo di Maneho

E ekipo di maneho ta na cabes di brandweer pa e proximo seis lunanan, mirando cu Brandweer Aruba keda sin liderazgo, despues cu a suspende E. Geerman for di su posicion.

E management team di Cuerpo di Bombero ta consisti di sr. Richinel Scoop como voorzitter. Sr. Scoop tin amplio experencia riba aspectonan di maneho y liderazgo, e tin su “Bachelor in Maritime Operations, Minor in Offshore with Dynamic Positioning” y tin experiencia como segundo ingeniero na Kustwacht, Duty Office JRCC Curaçao, Comandante di Kustwacht y Human Resource Advisor.

Sr. Tomas Correa, tin su Doctorale diploma in Arubaanse recht, y a traha pa hopi aña pa Land Aruba (Directie Telecommunicatie Zaken) como “Juridisch-Technisch Beleidsmedewerker”, lo asisti sr. Scoop. Ademas sr. Correa a termina Brandweer Academie na Arnhem na aña 1994 y a traha na nos Cuerpo di Bombero pa algun aña riba beleidsniveau como lider di proyecto pa diferente trayecto manera alarm centrale. E otro miembro di e ekipo di maneho, ta sr. Harold de Cuba cu ta forma parti di e ekipo di maneho di Brandweer pa algun aña.

Na mes momento a tuma e decision pa reenforsa e parti di bedrijfsvoering na brandweer
pa asina esaki por haya su debido atencion, cual ta hopi importante pa e operacion.
Esaki ta un decision temporario, mirando cu Ministerio di Husticia y Asuntonan Social
conhuntamente cu DRH ta den combersacion cu Hulanda pa asistencia a corto plaso
pero pa un periodo mas largo door di dos ex comandante di brandweer, pa asina traha un
“doorlichtingsrapport” y guia e organisacion aki pa e proximo dos pa tres añanan.

Ta importante pa tin un ekipo di maneho cu ta reenforsa cu e parti di bedrijfsvoering y administracion pa por inicia un trayecto nobo pa cuerpo di bombero, mientras ta busca un solucion duradero pa e leiding di Brandweer.