Conoce y Reconoce sintomanan di Chikungunya y Keintura Geel

Mirando e situacion regional, unda e cantidad di casonan di Chikungunya y Keintura Geel ta mustra aumento den varios pais den region di Sur America, ta importante pa comunidad di Aruba ta bon informa y alerta.

Chikungunya ta un malesa viral cu ta transmiti pa picadura di un sangura infecta. 

E sintomanan mas comun ta:

• Keintura diripiente
• Dolor fuerte den scarnirnan (articulacionnan, joints)
• Dolor muscular
• Dolor di cabes
• Cansancio extremo
• Rash (mancha riba curpa)

Den hopi caso, e dolor den articulacion por dura simannan of asta lunanan.

Keintura Geel (Yellow Fever) ta un malesa viral mas serio cu tambe ta transmiti pa sangura. 

E sintomanan inicial por ta:

• Keintura
• Dolor di cabes
• Dolor muscular
• Nausea y sacamento
• Cansancio

Den algun caso, e malesa por bira mas grave y causa:

• Color geel den wowo y curpa (ictericia)
• Problema cu higra
• Sangramento interno

DVG ta enfatisa cu no tur sintoma lo ta mescos, pero mester tuma tur sintoma sospechoso na serio.

Kico bo mester haci si bo tin sintoma:

• Busca atencion medico di inmediato
• No automedica
• Informa e dokter si bo a biaha recientemente
• Descansa bon y sigui instruccion medico

Accion rapido no solamente ta proteha bo mes, pero tambe ta yuda preveni propagacion di e malesanan aki den comunidad.

DVG ta recorda cu e forma mas efectivo pa preveni e malesanan aki ta combatiendo e origen: e sangura.

Yamada pa accion:

Cada ciudadano tin un rol importante den proteccion di salud publico. Elimina tur lugar unda awa por keda para:

• Basha awa di airco, drum y recipientenan
• Bolter awa di scoter di mata regularmente
• Keda alerta pa cualkier acumulacion di awa rond di cas. 

DVG ta sigui monitorea e situacion di cerca y lo continua informa comunidad di cualkier desaroyo relevante.