Congreso pa alinia educacion profesional cu e mercado laboral local
ORANJESTAD – Den cuadro di Learning CitiesAruba, Ministerio di Educacion a organisa riba dia 5 di october un congreso hunto cu EPI, OABA, EPB y SPO pa alinia educacion profesional cu e mercado laboral local y e expande oportunidad di pasantia pa e studiantenan di Aruba.
E sesion aki ta un esfuerso conhunto cu ta busca pa stimula mas colaboracion y aliniacion structural entre e institutonan cu ta ofrece formacion profesional na Aruba, entre nan: Scol Practico Educativo (SPO), Educacion Profesional Intermedio (EPI), Educacion Profesional Basico (EPB), y e Organisacion pa Avance di Bario y Aprendisahe (OABA).
Conecta enseñansa cu necesidad di nos pais
E meta principal di e sesion tabata pa discuti y intercambia ideanan concreto riba con pa conecta e contenido di e programanan educativo mas miho cu e necesidadnan di nos mercado di trabou. A traves di e dialogo aki, kier garantisa cu e studiantenan ta ricibi e conocemento y e habilidadnan cu e sector di trabou ta demanda awe.
Ademas, e sesion a pone un enfasis special riba e rol di pasantia. Ta considera pasantianan como e brug fundamental entre e klas y e mundo profesional, habriendo portanan pa e studiantenan haya experiencia practico y haci e transicion pa e mercado laboral mas suave y exitoso.
Compromiso pa e futuro di e hubentud
Durante e sesion, Minister di Educacion, Gerlien Croes, a resalta e balor di e mescla aki entre e sector educativo y e sector laboral. Nos mester sigura cu ta prepara nos hubentud pa e realidad y necesidadnan di nos mercado di trabou. Ora nos alinia e programanan di formacion profesional cu e demanda di nos empresanan y promove pasantianan di calidad, nos no unicamente ta inverti den e futuro di e studiante, sino tambe den e desaroyo sostenibel di e economia di Aruba.
E iniciativa aki ta marca un paso firme na caminda pa un sistema educativo mas dinamico, inclusivo y enfoca riba e exito di e studiantenan y e progreso di Aruba.