Conferencia y Congreso di Trastorno di Desaroyo di Idioma (TOS) organisa pa FEPOH y Learning Cities Aruba

E iniciativa aki ta brinda entrenamento pa educadornan y informacion pa henter comunidad riba dia 5 y 6 di october. Pa medio di seminario aki, Ministerio di Educacion a subraya e compromiso cu un enseñansa inclusivo y e apoyo continuo na e bienestar y desaroyo di tur studiante na Aruba.

E evento aki ta diseña pa capacita profesionalnan di educacion y conscientisa e comunidad general tocante e e retonan y solucionnan relaciona cu trastorno di desaroyo di idioma.

• Dia 5 di october – Conferencia di Desaroyo Profesional pa Educadornan:
  Un dia dedica exclusivamente na educadornan pa asina nan por adkiri conocemento pa identifica y apoya studiantenan cu TOS den e ambiente escolar. E sesion aki a enfoca riba strategianan pedagogico y metodonan practico pa uza den klas.
• Dia 6 di october – Congreso Nacional di Trastorno di Desaroyo di Idioma (Publico):
  Un congreso habri pa henter comunidad, unda cu lo profundisa den e tema di TOS, brinda informacion balioso y ofrece hermentnan practico pa uza na cas y den comunidad. E ta un espacio ideal pa intercambia experiencia entre profesionalnan di enseñansa, famia y publico en general.

E conferencia aki ta representa un oportunidad unico pa sigui fortalece e red di apoyo pa nos muchanan y hobennan. E evento aki ta completamente gratis pa tur participante. 

Minister di Educacion Minister Gerlien Croes ta gradici FEPOH conhuntamente cu Learning Cities Aruba pa organisa e congresonan aki. E topico aki ta uno sumamente importante y central pa crea un sistema di educacion mas inclusivo pa un y tur.