Conferencia di Small Island Developing States di Nacionnan Uni

E conferencia ta tuma luga na Antigua y Barbuda for di 27 pa 30 di mei y e tema di e aña aki ta ‘Charting the Course Toward Resilient Prosperity’. SIDS ta tuma luga cada 10 aña y pa e motibo aki ta importante cu Aruba como isla chikito forma parti di e conferencia aki.

Prome Minister Evelyn Wever-Croes lo atende e conferencia aki y lo encabesa e delegacion di Reino Hulandes.

Islanan Chikito den Estado di Desaroyo (SIDS) ta referi na un grupo di pais (isla) y teritorio cu ta comparti retonan y vulnerabilidad unico den nan desaroyo. Esaki ta debi na e caracteristicanan cu nan tin en comun manera: e tamaño chikito, ubicacion remoto y recursonan limita cu ta haci nan mas vulnerabel na factornan externo.

Aruba como pais autonomo den Reino Hulandes ta forma parti di SIDS como miembro asociado di Nacionnan Uni. Minister President di Aruba lo hiba palabra durante di e conferencia y lo reuni cu lidernan di varios pais, entre otro Barbados, Suriname y Antigua, pero tambe cu instancianan internacional di influencia mundial.