Comunidad ta responde un biaha mas e accion di Baki den Bario

E actividad di Baki den Bario e biaha aki a tuma luga den Dakota. A uza e tereno habri caminda antes tabata Club Dosva, pa asina por a dirigi e trafico/rij cu a forma durante di e mainta aki.

Durante eventonan di Baki di Bario, comunidad ta pidi pa haci e iniciativa aki cu mas frecuencia durante luna. Tin hopi bario cu tin e necesidad grandi aki pa deshaci di acumulacion di desperdicio y ta aprecia inmensamente e esfuerso cu ta haciendo di parti gobierno pa yuda benta e sushedad aki afo.

Tin mas bario cu pronto kier mira e Baki den Bario cerca di nan cas, y ta pa e motibo aki mes gobierno cu  diferente stakeholder, ta analisando e posibilidad di por yega na un structura mas permanente. Idea ta pa crea na cuater of cinco area riba nos isla, den forma structura, un base permanente caminda lo pone disponibel diferente baki, caminda comunidad por deposita nan sushi, cu despues Serlimar ta recoge y procesa.

Di otro banda tambe kier enfatisa cu, aunke e ta haci dolor pa scucha comentario cu pueblo ta warda te ora Gobierno ta den bario pa benta sushi afo, e ta mira e interes y compromiso di e pueblo pero e ta un realidad cu e costo relaciona cu bentamento di sushi di cas, no ta na alcance di hopi hende..

Durante mainta, un fila masa largo di auto cu desperdicio pa benta afo a drenta te den caya di Dakota. Esaki ta mustra tambe e disciplina/ responsabilidad cu comunidad tin pa tene nan cura y nan bario limpi. Pero nan no tin e recurso financiero pa bay un luga comercial pa dispone di nan desperdicio.

Gobierno a indica cu tin cu yega na un solucion pa locual ta e situacion di un Dump. Na momento cu a cera esaki a habri caminda pa crea diferente dump tur rond Aruba.