Comunidad ta aporta cu informacion clave riba e sobrevivencia di shoco na Aruba

Desde 2020, comunidad di nos isla a contribui cu 87 reportahe, loke ta brinda un mapa importante di unda e Shoco (Athene cunicularia arubensis) ta prospera y unda e ta na peliger.

Nos tin un comunidad activo y vigilante

E resultadonan di e encuesta ta duna indicacion cu nos pueblo ta duna aporte y cooperacion pa yuda colecta data. Di e reportahenan registra entre 2020 y 2026:

• 83% di e participantenan a logra observa por lo menos un shoco.
• 78% di e reportahenan a identifica bida den e neishinan, pues neishi activo cu yiu.
• Pareha shoco ta prevalece: E observacion mas comun tawata cu tin presencia di un par di shoco (38% di e reportahenan), loke ta un señal positivo pa e proceso di reproduccion.

Unda e Shoco ta biba

Segun data di e proyecto Radar di Shoco, e shoconan cada bes ta observa den cercania y banda di e areanan urbano. Frecuentemente a reporta cu a wak nan banda di:

• Scol- y veldnan di deporte: e areanan unda tin hopi actividad di Shoco ta unda tin un tereno habri y cu seronan chikito di santo.
• Mondi: areanan di mondi situa tras di barionan residencial.
• Neishi artificial: a nota shoco den e neishinan traha pa hende riba terenonan di scol, unda a observa cu e shoconan ta haci uzo di e ‘artificial burrows’.

Menasanan critico y preocupacion di comunidad

Aunke e presencia di shoco chikito y hubenil ta indicacion cu tin reproduccion exitoso, e reportahe ta enfatisa tambe e peligronan significante. Comunidad a expresa preocupacion tocante:

• Perdida di habitat: rosamento di tereno y construccion acelera ta keda e menasa principal pa e neishi di Shoco.
• Interferencia humano: trafico pisa cerca di e neishinan y desordo cuasa pa actividad recreativo por stroba e shoconan durante nan temporada di broei.
• Destruccion di neishi: na un forma preocupante, tin varios reportahe cu ta menciona e desaparicion of destruccion intencional di neishinan registra.

E shoco ta mas cu simplemente un parha; e ta e simbolo nacional di Aruba. E hecho cu ciudadanonan ta raportando e observacionnan aki activamente ta demostra un deseo profundo pa proteha nos herencia natural. 

Con abo por yuda

Por yena e encuesta Radar di Shoco y sigui actua como e "wowo y orea" pa proteccion di e shoconan. Door di raporta loke bo ta mira, comunidad ta yuda cu datonan y informacion, y asina yuda identifica e areanan cu mester di accion. 

Raporta

Pa raporta un Shoco of un neishi activo, por tuma contacto cu DNM via info@dnm-aruba.org , yama 5841199 of uza e plataforma oficial di Radar di Shoco y yena tur data. 

E shoco ta un especie protegi pa ley na Aruba y ta reconoci como Aruba su simbolo nacional. E parhanan aki cu ta traha nan neishi den tera, ta endemico (unico) na Aruba como un sub-especie y tin nan rol den e ecosistema local. Ban yuda pa su conservacion y proteccion, raporta cerca DNM ora observa nan.