Comite Olimpico Arubano a entrega regalo na Prome Minister
ORANJESTAD – Diaranson 17 di juli 2024, Prome Minister Evelyn Wever-Croes y Minister di Enseñansa y Deporte Endy Croes a ricibi representantenan di Comite Olimpico Arubano (COA).
Secretaria General di COA, Nicole Hoevertsz y Hefe di Mision Paris 2024, Kamilah Dammers, a haci entrega di e pakete di uniform cu e atletanan lo uza durante e Weganan Olimpico na Paris 2024, na Prome Minister y Minister di Deporte.
E pakete di uniform ta consisti di:
- 1 jacket;
- 3 shirt di cual 1 blauw scur, 1 blauw cla y 1 blanco;
- 1 pechi
- 1 pin di Weganan Olimpico Paris 2024.
E tema di e uniform e biaha aki ta "Fauna" y e diseño ta consisti di 3 bestia di Aruba, cu ta e lagadishi, turtuga y trupial den un mix di tono di color blauw cual ta representa nos lama. Totto a sponsor e uniformnan cual ta traha di material recicla y imprimi cu ink biodegradabel, asina dunando su aporte tambe na e agenda di Metanan di Desaroyo Sostenibel (SDGs) 2030 di Nacionnan Uni.
Weganan Olimpico di Paris 2024 ta tuma luga dia 26 di juli pa 11 di augustus y Aruba tin seis atleta cu ta competi.
E delegacion ta consisti di e atletanan:
- Shanayah Howell; Ciclismo/BMX
- Chloe Farro; Landamento
- Ethan Westera; Vela/Windsurfing Men
- Just van Aanholt; Vela/Single Handed Men
- Mikel Schreuders; Landamento
- Philip Elhage; Tiro
Prome Minister, den nomber di Gobierno y henter e pueblo di Aruba, ta desea cada un di e atletanan competiendo den e Weganan Olimpico Paris 2024 tur clase di exito.
Pa informacion di e atletanan durante e weganan olimpico: https://www.facebook.com/comiteolimpicoarubano