Comision Celebracion Dianan Nacional saliente a entrega su relatonan financiero na Departamento di Cultura.
ORANJESTAD - Siman pasa e Comision Celebracion Dianan Nacional (CCDN) saliente representa pa su Vice Presidente Sr. Junior Arends, Tesorero Sra. Jeanine Franken y miembro Sr. Marlon Rasmijn a entrega oficialmente su relatonan financiero, cubriendo e periodo di 2018 te cu maart 2025, na señor Siegfried Dumfries, Director di Departamento di Cultura Aruba (DCA).
Ta instala CCDN su comision pa medio di un Decreto Ministerial di e Minister di Cultura, cu ta defini su tarea pa planifica, coordina y organisa e eventonan oficial y tradicional di nos pais, fortaleciendo asina nos identidad nacional y herencia cultural.
Durante e periodo 2018 – 2025 (maart), e comision a organisa celebracionnan manera Dia di Betico, Dia di Himno y Bandera, Dia di Rey, San Juan – Dera Gay, Yegada di Sinterklaas, Festival di Dande, Dodenherdenking y ultimo Dia di Boy Ecury.
E entrega di e relatonan ta representa un paso crucial den cumpli cu e responsabilidad formal di e comision, reflehando un maneho responsabel y transparente di e fondo gubernamental proveniente di DCA. E documento ta inclui un resumen di actividadnan y con e medionan financiero a utiliza.
E comision ta expresa su gradicimento na Gobierno di Aruba, Ministerio di Cultura anterior y DCA pa e apoyo constante. Un palabra special ta bay na Sr. Marlon Rasmijn, empleado di e seccion financiero di DCA, cu como miembro di CCDN a duna gran sosten den e administracion financiero.
Agradecimiento tambe ta bai na tur miembro actual y anterior di CCDN, asina tambe na tur partner, institucion, empresa y comunidad local cu a contribui na e exito di cada evento.
E comision ta honra y gradici tambe tur artista, musico, artesano y bendedo cu a duna bida y color na e celebracionnan nacional.
Cu e entrega aki, e Comision ta cera un capitulo di labor cumpli cu transparencia y dedicacion, reafirmando su compromiso pa sigui preserva y honra nos identidad cultural y nacional. Tabata un honor di tabata tin e oportunidad pa por a traha pa nos Pais Aruba.