Colegio Hilario Angela ta inaugura su hardin di alimentacion
ORANJESTAD – Riba diasabra 23 di maart 2024, un otro hardin di alimentacion di agroforesteria a ser lansa na un scol basico, promoviendo asina e integracion di practicanan di agricultura sostenibel den e educacion di nos muchanan.
E scol a planta un hardin di alimentacion cu sosten di Ministerio di Naturalesa, Santa Rosa, maestronan, studiantenan y miembronan di comunidad. Tur hunto a uni forsa, demostrando cu invertiendo den nos muchanan ta un inversion directo den e futuro di nos Pais.
Colegio Hilario Angela ta conoci pa su metodo Montessori cual ta enfoca riba, entre otro, indepencia di muchanan. Alabes e scol ta subraya e importancia di conecta cu naturalesa. Pues, e proyecto di agroforesteria ta haya su lugar perfecto na Weg Fontein.
E iniciativa di agroforesteria den e scolnan primario lo sigui cu mas dianan di plantacion, e proximo ta planea pa diasabra 20 di april 2024 na St Paulus Basisschool, cuminsando 7'or di mainta te cu 1'or di merdia.
Minister di Transporte, Integridad, naturalesa y Asunto di Adulto Mayor, Ursell Arends ta gradici na Santa Rosa, Living Soil, y specialmente na Colegio Hilario Angela, su directora Sra. Conny Aventurin como tambe e coordinador di e proyecto, Sra. Shaneila Geerman.