Cla pa sirbi nos pais: huramentacion y entrega di diploma y certificado
ORANJESTAD – Riba 19 di september Scol di Polis E.J. Watty Vos a haci entrega di diploma MBO na Klas N4-2021, huramentacion di klas 2023 y entrega di certificado Sub-Fiscal tambe certificado di “leren les geven” na docentenan di Scol di Polis E.J. Watty Vos.
E ceremonia a conta cu presencia di Minister di Husticia, Integracion y Transporte Publico, mr. drs. Arthur Dowers, Procurador-Generaal sra. Amalin Flanegin, Altocomisario di Polis drs. Ramon Arnhem conhuntamente mando policial, staf y personal di Scol di Polis E.J. Watty Vos,
Diesun studiante di klas N4-2023 a huramenta dilanti Minister di Husticia pa asina nan por sigui cu e siguiente fase pa por subi caya y sigui cu nan estudio policial.
Klas N4-2021 a termina nan estudio policial di cuater aña. Nan a firma nan diploma di MBO Policial. Despues di 4 aña intensivo di training y preparacion policial como tambe estudio di ley nos tin 20 agente policial nobo pa sirbi nos comunidad.
Riba e ocasion special aki tambe dies personal tanto di KPA tambe Landsrecherche, cu a termina nan curso di Sub-Fiscal a haya nan certificado oficial. Tambe nuebe docente di scol di Polis E.J. Watty Vos cu a sigui e curso di “Leren les Geven” a haya nan certificado.
Nos ta gradici cada famia di e agentenan cu a bin presencia e momento special aki. Esaki ta un etapa importante pa e agentenan y ta danki na e sosten di famia cu ta haci esaki posibel.
Cuerpo Policial Aruba ta orguyoso di mira progeso y desaroyo personal na cada un agente policial, como tambe e miembronan di Landsrecherhe. Mas conocimento nifica progreso personal pa nan mes y pa nan carera policial.