Ciclo 8 di e proyecto di innovacion Edutech ta habri

Pa por participa, scolnan por aplica y registra desde awor caba te cu dia 21 di october 2024. 
Gobierno di Aruba a pone 100 mil florin disponibel pa e proyecto aki, pa asina por cumpli cu soño di mas o menos 3 á 4 scol. 

Mirando cu esaki ta un oportunidad grandi pa asina scolnan por haya financiamento pa materialnan di digitalisacion, Prome Minister ta encurasha tur e alumnonan di scol pa uni hunto cu nan mayornan, docentenan, y otro alumnonan pa asina traha riba e proyecto di innovacion pa nan scol desea. E ta bon pa analisa hunto kico en realidad e scol lo tin mestery/of ta desea pa facilita educacion, y traha esaki pa asina tin e oportunidad di gana.  

E ciclo 8 aki ta cera un total di 800 mil florin cu Gobierno a bin ta pone durante e ultimo 2 añanan, pa yuda cu materialnan di digitalisacion pa scolnan. E ciclo aki, probablemente lo ta e ultimo ciclo di Edutech. A introduci e idea aki, di Gobierno di Aruba hunto cu Futura, pa yuda e scolnan adkiri materialnan digital necesario pa asina haci e proceso di educacion na e scolnan mas agradabel y eficiente. Awor a yega momento pa traspasa e proyecto di innovacion pa Ministerio di Enseñansa pa asina e nan por sigui cu esaki.