Celebracion di 75 aña di Tratado Europeo riba Derechonan Humano
ORANJESTAD – Den cuadro di 75 aña di Europees Verdrag pa Derecho Humano, Minister di Relacionnan den Reino, Educacion, Hubentud, Innovacion y Deporte, mr. Gerlien Croes, ta pone enfoke special riba conscientisacion y educacion referente na derecho humano den sistema escolar Arubiano.
A manda material educativo na tur schoolbestuurnan cu e peticion pa trata e tema di Derecho Humano den klas. E iniciativa ta busca pa fortalece e comprension di hobennan tocante nan derecho y responsabilidad como ciudadano den un sociedad democratico.
Minister Croes ta gradici Comision di Derecho Humano di Mucha, presidi pa Sacha Geerman, y Comision di Derecho Humano, presidi pa Jocelyne Croes, directora di Departamento di Relacionnan Exterior (DBB), pa nan labor dedica den prepara e lesbriefnan aki. Danki na nan esfuerso, tanto scolnan primario como scolnan secundario lo ricibi material adapta na nivel y necesidad di e alumno y studiantenan.
Den marco di e celebracion, e siman aki Aruba lo ricibi e hues Jolien Schukking, representante di Reino Hulandes den Europees Hof voor de Rechten van de Mens. Jolien Schukking lo tene un charla na Universidad di Aruba awe, 27 di october, habriendo espacio pa dialogo y reflexion riba preservacion di derecho humano den Reino.
Minister Croes a enfatisa cu e celebracion aki no ta simplemente conmemora pasado, sino ta forma parti di prepara pa futuro:
“Conoce bo derecho ta base pa conoce bo bos y bo luga den comunidad. Nos ta desea cu nos hobennan crece como ciudadanonan cu ta consciente, participativo y sigur di su propio balor”.
