Cas Tipico Arubano na Alto Vista 12 awor ta monumento protegi

Cu e acto aki, e cas ta bira parti oficial di e patrimonio historico di Aruba y lo keda conserva pa e generacionnan den futuro.

E ceremonia a reuni diferente miembro di famia Werleman, representando varios generacion cu a crece, biba y forma parti di e historia di e cas. Durante su discurso, Prome Minister Eman a destaca cu e reconocemento no ta solamente pa e edificio, sino tambe pa e legado humano, cultural y comunitario cu e cas ta representa.

Mas cu un cas
Segun Prome Minister Eman, e cas na Alto Vista 12 ta simbolisa e balornan importante manera perseverancia, determinacion, sentido di famia y compromiso cu comunidad.

Hunto cu e cas, Aruba ta conserva tambe e historia di un famia cu a laga un marca profundo den comunidad. A  dedica tambe atencion special na Antonio “Toni” Werleman y su esposa, kende durante nan bida a contribui significativamente na cultura, musica y desaroyo social di Aruba.

Toni Werleman tabata conoci como un persona semper dispuesto pa yuda otro, cu un actitud positivo y cu un dedicacion constante pa haci Aruba un luga miho. Su amor pa su famia, su comunidad y su pais a haci cu hopi persona ainda awe ta corda riba dje cu aprecio y respet.

Legado den cultura y comunidad
Durante e ceremonia a resalta tambe e rol importante cu Toni Werleman a hunga den promociona musica Arubano y den preservacion di identidad cultural. Su liderazgo, compromiso y amor pa su comunidad a laga un impacto cu ainda ta sinti awe dia.

E historia di famia Werleman ta un ehempel di con esfuerso, trabou duro y dedicacion, un famia humilde por contribui significativamente na progreso di comunidad y pais. E legado cu a  traspasa di generacion pa generacion ta forma parti di e historia di Alto Vista y di Aruba mes.

Responsabilidad comparti
Cu e colocacion di e seyo oficial, e cas ta haya un reconocemento special como monumento protegi. E reconocemento aki ta bin cu un responsabilidad comparti pa conserva, cuida y preserva e patrimonio pa futuro.

Gobierno a expresa su agradecimento na Monumentenbureau Aruba, na famia Werleman y na tur esnan cu a contribui pa haci posible e proteccion oficial di e cas.