Cas di Cultura a presenta plan ambicioso di renobacion y expansion
ORANJESTAD - Directora di Cas di Cultura/ Stichting Schouwburg ArubaSra. Vicky Arens-Tjon A Tjoe, acompaña pa representantenan di Aruba Invest Bank, a duna Prome Minister mr. Mike Eman, encarga cu cultura, un presentacion di e plan di renobacion y expansion di Cas di Cultura.
A presenta e plan, diseño y escogencia di colornan pa cada espacio y e parti tecnico moderno cu ta inclui den e renobacion.
Ya ta algun aña caba cu a inicia cu e plan di renobacion, pero e situacion ultimo cu a forsa e ceramento di e sala principal di Cas di Cultura, a acelera e necesidad pa inicia cu e proyecto grandi aki cu ta calcula rond di 17 miyon florin. Hunto cu Aruba Investment Bank, ta sondea maneranan pa yega na e fondonan necesario riba mercado, cerca Gobierno of pa medio di fiansa.
E proyecto ta uno hopi moderno y eficiente den uzo di energia y ta inclui entre otro porta y bentana isola, panel solar, re-uzo di awa, LED lights etc. E obhetivo ta pa tin un facilidad moderno y cu ta mas eficiente posibel den uzo di energia pa e siguiente 30 pa 40 aña.