Carnaval 72 ta cuminsa oficialmente cu celebracion festivo riba 11-11
ORANJESTAD — Pa exactamente 11:11 a.m. dia 11 di november a resona e jingle oficial di Carnaval pa asina yama Carnival 72 bonbini.
E ceremonia, cu a tuma luga dilanti di invitadonan y sponsernan, a marca comienso di e temporada mas colorido y anticipa di e isla.
Memey di aplauso, musica, y exhibicionnan vibrante, e ambiente a refleha e emocion y orguyo cu Carnaval ta trece pa Aruba cada aña.
Prome Minister Mike Eman, como mandatario encarga cu Cultura, a felicita e instancianan organisado SMAC, MUSICA, y tur esnan dedica na conserva y promove e tradicion di Carnaval di Aruba.
El a resalta e rikesa di talento denter di e comunidad Arubano, particularmente den arte, musica, y creatividad, y a enfatisa e importancia di union y colaboracion. Carnaval ta mas cu un celebracion; e ta un refleho di nos spirito comunitario. Cada bario, club, organisacion, y ciudadano ta contribui di algun manera pa haci di nos Carnaval un tesoro nacional reconoci rond mundo.”
Prome Minister tambe a reafirma e compromiso di gobierno pa sostene organisacionnan y actividadnan relaciona cu Carnaval. El a encurasha e comunidad pa sigui mustra Aruba su creatividad, boluntarismo y dedicacion, balornan ku ta haci e Carnaval di Aruba un di e mihonan na mundo.
Cu orguyo y pasion ban celebra nos Carnaval.
