Campaña di Trafico Sigur a start

E uzo di ‘child seat’ den trafico ta di suma importancia, pa motibo cu e pasaheronan di mas chikito ta core mas peliger na momento di un accidente. Accidente den trafico ta e causa principal di morto di mucha rond mundo y segun ‘World Health Organization’ (WHO), mas o menos 1.35 miyon persona ta perde nan bida den accidente di trafico cada aña, di cual muchanan ta core riesgo inocentemente.
Child seats ta yuda reduci e probabilidad di morto entre infante (baby) cu 71%, y 54% pa mucha den auto na momento di un accidente. Nos responsabilidad como mayor y cuidado di mucha ta pa proteha e muchanan lo mas tanto posibel. Pa e motibo aki ta promove e lema; “Salba Bida y Scoge pa Siguridad”.

Mayoria accidente den e ultimo añanan ta bin door di factornan cu ta pone otro y nos mes na peliger, cual facilmente por evita. Na final di 2022 a registra 7,341 accidente riba caminda di cual 13,069 persona tabata envolvi y 75% tabata evitabel.

E campaña su meta principal ta pa mehora siguridad riba caminda y reduci accidente. Durante e prome fase di e campaña, lo enfoca riba educacion y conscientisacion di e factornan cu ta forma e peligernan mas comun manera core bou influencia di alcohol, core na un velocidad halto, distraccion den auto manera uzo de telefon celular, uzo di seat belt y child seat.

E iniciativa pa e campaña aki ta e resultado di un colaboracion entre diferente stakeholders cu ta ta promove un cultura di siguridad den trafico. Pronto lo lansa e website www.traficosigur.aw.