Awa di laman

Ta monitor e awa di lama na e parti zuidwest di nos isla desde april 2006. Pa e proceso aki Servicio Higienico ta tuma muestra (monsters) dos biaha pa luna. E departamento di Microbiologia di Laboratorio Nacional ta analisa e pruebanan segun e normanan di NEN. E resultado di e monitor ta indica cu e awa di lama ta cumpli cu e criterio stipula pa e blauwe vlag (bandera blauw) y pues e ta di bon calidad.

Sinembargo, investigacion bacteriologico di e awa di lama na e punto unda ta basha(deposita) awa sushi na San Nicolas, ta indica midimentonan halto y inadmisibel. Door cu e punto unda ta basha (deposita) awa ta situa riba e tereno di e refineria, e risico di exposicion directo na e awa aki ta limita. Sin embargo e ta forma un risico inadmisibel pa plamamento. Ta monitor e awa di laman pa preveni un calidad inacceptabel di e awa pa landa. Esaki ta conta tambe pa e calidad di awa di lama como materia prima pa awa di bebe di e planta di desalinacion W.E.B. Aruba N.V.

E red di monitor di awa di lama ta suministra dato pa formula un maneho di calidad di awa di lama. Cu esaki ta haci control na un forma obhetivo relaciona cu e condicionnan mara na e permiso/exoneracion. Departamento di Naturalesa y Medio Ambiente lo interveni ora cu ta surpasa e normanan stipula pa asina garantisa un medio ambiente di bida y trabou cu ta sano y limpi.

E problematica rond di e calidad di e beachnan cu ta empeorando ta conoci pa aña caba. Gobierno a desaroya un plan den etapa relaciona cu e asunto aki. Ademas gobierno a institui un comision (despues conoci como e comision di watersport (deporte acuatico) cu mester a bin cu recomendacion con, unda y ki ora of den cua caso mester tuma medida. E rapport emiti door di e comision ta dirigi riba e regulacion di e actividadnan di watersport (deporte acuatico), cu ta causa hopi daño na nos medio ambiente y tambe ta causa erosion considerabel na nos beachnan.

E red di monitor e awa di lama ta suministra continuamente dato di vigilancia pa garantisa e seguridad di e awa pa landa. Inspeccion di Salud Publico y Medio Ambiente ta vigila e datonan suministra y ta acopla esakinan bek na e Coastal Zone Management (CZM) p’asina por mantene e normanan di e Blauwe Vlag (bandera blauw). Esaki ta nifica cu otro palabra cu CZM lo hisa e bandera blauw ora cu ricibi dato negativo di e awa pa landa segun e principionan di e Blauwe Vlag.

Dam y tanki 

Tur tanki y dam publico ta bou di e maneho di Santa Rosa (Directie Landbouw, Veeteelt, Visserij en Markthallen-DLVVM). Santa Rosa ta percura pa e tanki y damnan aki keda limpi y sin sushi, cu nan ta bon accesibel y ta controla e murayanan di e damnan pa peligro di basha aden (derumbe) p’asina preveni inundacion. Desde april 2006 ta controla ocho (8) tanki y dam publico tur luna segun e Raport Red di Monitor Awa di 16 di december 2004. Claro cu e monitor por tuma luga solamente ora e damnan y e tankinan ta suficientemente yen cu awa. Servicio Higienico ta tuma e muestranan (monsters) y e Departamento di Microbiologia di Laboratorio Nacional ta haci e analisis microbiologico. Ta uza awa di dam pa irigacion y otro meta relaciona cu agricultura y pa e motibo aki e awa di irigacion tin cu cumpli cu e normanan stipula pa e Organisacion Mundial di Salud (World Health Organization) (anexo 2 di e raport red di monitor di awa, 16 dec. 2004).    


Ta manda e resultadonan di Laboratorio Nacional tanto pa Departamento di Naturalesa  y Medio Ambiente, como pa Santa Rosa y Servicio Higienico. Door di contaminacion cu por ehempel awa di beerput of un bestia morto den awa, por surpasa e norma stipula. Si esaki ta e caso, Santa Rosa(DLVV) lo saca un advertencia cu ta indica cu e awa di e dam concerni no ta apto pa uzo. Esaki ta nifica tambe cu lo stop cu e entrega di awa for di e dam ey door di Santa Rosa. Door di e medida, e tempo cu tin cu warda pa haya entrega di awa por aumenta considerablemente. Den e caso aki tin cu ripiti e tumamento di muestra (monsters) di e awa. Solamente si den un siguiente investigacion ta indica cu e awa ta cumpli cu e normanan stipula, e ora ey por uza e awa.
Un biaha pa aña Laboratorio Nacional tambe ta manda muestra (monsters) na un laboratorio di referencia na Hulanda pa investigacion riba metal pisa.
Ta manda e resultadonan pa e siguiente instancianan di interes (Santa Rosa-DLVV, Departamento di Naturalesa y Medio Ambiente y Medio Ambiente y Servicio Higienico).

E deseo ta pa den futuro monitor c.q. vigila tur tanki y dam publico cu ta ser uza pa irigacion y agricultura, p’asina garantisa e seguridad di e awa. Esaki ta necesario en bista di e hecho cu regularmente ta basha awa sushi, sin purifica na un forma ilegal den e diferente damnan y tankinan, loke ta encera un peligro pa salud publico.

Si bo wak un persona of un compania di chica pos (septic tank) ta basha awa sushi den (cercania di) un dam of tanki, nos ta pidi bo persona pa por fabor tuma contacto cu Santa Rosa (DLVV), Servicio Higienico, Departamento di Naturalesa y Medio Ambiente,of Polis (tel. 100). No lubida di skirbi e number di e plachi di e auto y/of e nomber di e compania di chica pos.

Awa sushi

E awa sushi (baño, wc, laba coi kibra, etc.) di casnan di un parti di Oranjestad, e asina yama “tourist corridor” y un parti di San Nicolas ta bay laman via riool. E parti mas grandi di e awa sushi produci ta bay den beerput y tanki septico. Ta procesa mas o menos 30% di awa sushi den e planta di purificacion di awa di riool (RWZI- rioolwaterzuiveringsinstallatie) na Bubali y ta basha (deposita) aproximadamente 6% di awa sushi, sin purifica, den lama.

Ta hiba y deshaci di un gran parti di e awa sushi di e parti west di nos isla na RWZI na Bubali. Door di e aumento inespera di e cantidad di awa sushi, a surpasa e capacidad di procesamento di RWZI. Door di optimalisa e planta di purificacion y e saneamento di Bubaliplas ta preveni cu ta basha awa di riool no-purifica y no-procesa den lama, cu tur e consecuencianan indesea pa turismo y salud publico cu esaki ta trece cune. E awa sushi di San Nicolas y bisindario cu ta ser basha na e costa zuid, tambe tin un influencia negativo riba e rifnan di coral. E rifnan di coral banda di e costa zuid ta di un importancia hopi considerabel pa e biodiversidad y ta lugarnan di recreo pa hende local y turista. Manera cu a menciona den Awa di lama, gobierno tin un tarea importante pa proteha tur e areanan aki pa medio di un parke bou di awa (parke marino).

E Plan structural di awa sushi (awa di desperdicio) 1997-2010 ta un plan di mas aña pa organisa y mehora e coleccion, transportacion, e tratamento y e re-uzo di e awa sushi di tal manera cu for di punto di bista di medio ambiente y salud publico ta alcansa e situacion desea.
E meta ta pa elimina mas tanto cu ta posibel bashamento di awa di riool den lama, pa conecta mas cas y negoshi cu ta posibel riba e sistema central di riool, e re-uzo di e awa di riool purifica pa landscaping y si e ta suficientemente purifica, tambe pa agricultura y horticultura.

E situacion, manera describi anteriormente, ta preocupante pa San Nicolas unda continuamente ta basha awa di riool na e beach di Zeewijk den lama. En conexion cu e problematica aki mester referi na e tercer protocol di e Tratado di Cartagena, e asina yama LBS protocol (“Protocol concerning Pollution from Land-based Sources and Activities to the Convention for the Protection and Development of the Marine Environment of the Wider Caribbean Region”), cu poco tempo pasa a ser institui na Oranjestad. Pa por cumpli cu e normanan stipula den e protocol, lo ta necesario pa instala un planta di purificacion di awa di riool na San Nicolas.
En conexion cu esaki DOW hunto cu Departamento di Legislacion y Asunto Huridico ta trahando riba un ley di awa sushi (awa di desperdicio) pa reemplasa e ley existente, den cual por cierto no tin regla pa proteha nos medio ambiente hinca aden. E enfasis ta riba un bon funcionamento di e sistema di hibamento di awa sushi for di e hogarnan via e plantanan di purificiacion (RWZI) y pa proteha e bon funcionamento di e plantanan. Un problema relaciona cu esaki ta consisti di e bashamento di awa sushi cu no ta bin for di e casnan cu ta riba e sistema di riool. Pa limita esaki a tuma medida temporario, pero al fin y al cabo un solucion structural ta necesario pa e situación.

Nota marginal: E RWZI nobo mester funciona di tal manera cu den caso cu basha awa no-purifica den lama, e awa aki ta cumpli cu e exigencianan stipula pa e “Blauwe Vlag” (bandera blauw). Den caso cu ta uza e awa cu e meta pa irigacion, e ora ey e mester cumpli cu e normanan di Organisacion Mundial di Salud (World Health Organization) (anexo 2 di e rapport di e red di monitor di awa, 16 dec. 2004).