Buki ‘Niets zal ik onbeproefd laten’ di Olga van der Klooster

Olga van der Klooster a entrega su ultimo publicacion na directora Sra. Astrid Britten y Sra, Zetsia Ponson, encarga cu Dept. Arubiana. 

Resumen di e buki:

E asina yama ‘Van Koolwijkcollectie’ ta un di e coleccionnan mas diverso di e herencia cultural di Aruba, Boneiro, y Corsou. Den siglo 19, un interes academico creciente den e cultura indigena di e Islanan ABC a surgi for di Hulanda. Anton van Koolwijk, kende tabata pastor riba e tres islanan entre 1871 y 1886, a mira un rol importante pa su mes. El a acumula un variedad di coleccion pa e museonan nacional Hulandes, hofinan, y e exposicion Internacional di Comercio Colonial y di Exportacion na Amsterdam (1883). E coleccion ta consisti di cocolishi, mata, sorto di palo, spons di laman, y obhetonan arkeologico y etnografico. A paketa tur articulo cuidadosamente y manda nan pa e instancianan concerni na Hulanda pa investigacion cientifico. 

Contrario na Boneiro y Corsou, unda e no a topa mas cu ningun indjan cu por a identifica, na Aruba el a topa cu un sociedad tradicional, aunke uno na punto di disparce. Hende di edad a bis’é cu nan a presencia entiero di Indjan. Nan tabata conoce Tio Kaussie, e ultimo piscado Indjan di Tanki Flip, y tambe Nicolaas Pijclaes, e supuesto ultimo Indjan di Savaneta. Van Koolwijk ta haci lihe pa graba nan historia, studia nan idioma antiguo, y documenta nan conocemento di mata medicinal. E a recoge tambe nan obhetonan di tur dia, manera paña, sapato, macutu, sombre, instrumento musical, articulo di cushina, y hasta un conchi cu hangua di cadushi pa cose paña. Y contrario na Boneiro y Corsou, caminda e a haya solamente skerpinan los, den e suela di Aruba a haya urna di entiero, purun di awa y potchi traha door di Injan.

Loke a bira conoci como e 'Van Koolwijkcollectie' en realidad ta un coleccion cu varios hende a hinca den otro. Na Aruba, Van Koolwijk ta haya asistencia di guianan, Pastoor Hendrik de Vries, maestronan di districto Hein Maduro y Johannes Kort, doño di Hofi Fontein, sastre Frederik Olivet, maestro di scol Hermanus Kuiperi, y decenas hende cu a keda anonimo. Varios museo Hulandes ainda ta maneha e coleccionnan. Por haya e obhetonan arkeologico y etnografico den e depositonan y exposicionnan permanente di Wereldmuseum na Amsterdam y Leiden. Un cantidad chikito ta riba prestamo na Museo Arkeologico Nacional Aruba (NAMA) desde 2009. E obhetonan ta unico y ta representa un balor di museo halto. Pa e Islanan ABC, e herencia cultural aki tambe ta mara na nan historia y identidad tangibel y inmaterial.

Olga van der Klooster a haci diesdos aña di investigacion. E ta un historiado arkitectonico y cultural y co-autor di e publicacionnan anterior “Bouwen op de Wind, Architectuur en Cultuur van Aruba” (Construi riba Biento: Arkitectura y Cultura di Aruba) y “Monumentengids Aruba” ( Guia di Monumento Aruba).