Buki ‘Aruba en een keuze uit haar toponiemen’ traduci na Ingles

Esaki ta un publicacion cu ta duna splicacion di nomber di bario y districto na Aruba. Directora Sra. Astrid Britten di Biblioteca Nacional Aruba a haya 2 ehemplar for di Vi Frank jr., yiu homber di Dr. Vivienno L. Frank sr. E buki aki tambe ta bira parti di e Coleccion Nacional.

Nombernan di luganan na Aruba manera ‘Cudarebe’, ‘Marawiel’, ‘Macuarima’, y ‘Hudishibana’, di unda nan ta bin? Cua ta nan origen? Dicon nan yama asina? E famoso filosofo Griego, Aristoteles, a yega di bisa “Duda ta e comienso di tur sabiduria”. Diez aña pasa, duda den tur e storianan y leyendanan cu ta core rond tocante e origen di e nombernan di luga na Aruba, a conduci cu Ing. Vivienno L. Frank, ex-hefe di Kadaster kantoor na Aruba, a embarca den un odisea pa decifra hopi di e enigmanan cu tabata tin tocante e origen di e toponimonan Arubiano.

Un aventura cu a dura diez aña y cu a hib’e ta consulta hopi documento y mapa antiguo, y cu a desenmascara hopi leyenda bieu y alabes a pone cu mitologianan nobo a mira luz di dia como “posibel berdadnan”. Berdad ta cu nan tabata mara wiel na Marawiel… pero no n’e forma cu folklore local ta relata. Mayoria hende na Aruba sa cu ‘Hudishibana’ y ‘Cudarebe’ tin nan origen den lenga indjan antiguo, pero cua idioma y kico nan traduccion ta na Papiamento, ta un di e topiconan central di e buki. Cu Macuarima ta bin di un nomber di un princesa indjan? No segun Ing. Frank, kende ta manda e storia aki p’e mundo di fantasia di un conocido escritor Arubiano, y ta argumenta e posibel berdadero origen di e nomber.

https://www.bibliotecanacional.aw/pages/aruba-en-een-keuze-uit-haar-toponiemen/