Buiten beeld, buiten controle- Un investigacion riba e fondonan di presupuesto di Pais Aruba
ORANJESTAD - Dia 8 mei 2026 Algemene Rekenkamer a publica e rapport “Buiten beeld, buiten controle”– un investigacion tocante e fondonan di presupuesto (begrotingsfondsen) di Pais Aruba (e Pais). E resultado di e investigacion ta duna tanto Parlamento como e cuidadano un miho bista riba e uzo y e funcionamento di e begrotingsfondsen den e maneho financiero di e Pais. E rapport ta mustra con ta uza e fondonan den practica y kico ta e consecuencia pa transparencia, supervision y control for di Parlamento.
Den esaki, Algemene Rekenkamer ta enfatisa cu un begrotingsfonds no ta un meta riba su mes, sino un instrumento cu mester contribui na un bon maneho financiero controlabel y legitimo. Cu e rapport aki, Algemene Rekenkamer kier amplia e bista publico, proteha e derecho presupuestario di Parlamento y stimula e gobernacion pa trata e fondonan publico na un manera responsabel. Ta pone enfasis tambe cu mester evalua bon e uzo di e begrotingsfondsen y cu esaki por tuma luga solamente ora e necesidad ta claramente hustifica y demostra.
Begrotingsfondsen ta destina pa uza fondonan publico cu ta dirigi pa metanan specifico y cu por uza durante varios aña. Nan ta uz’e ora cu e sistema regular di e presupuesto di e Pais no ta permiti pa reserva fondonan pa mas cu un aña.
For di e investigacion ta resulta cu den practica, structuralmente, tin falta di cumplimento di e cuadro legal. Aunke ley y regulacionnan ta pone exigencia cla tocante trahamento di presupuesto, cuenta anual y suministro di informacion, no ta aplica e reglanan di forma consecuente.
Un problema fundamental cu e investigacion ta expone, ta falta di un cuadro di maneho general pa e uzo di e begrotingsfondsen. Sin punto di salida, reglanan y metanan cla, ta dificil pa esnan encarga cu e maneho, esnan encarga cu supervision y Parlamento por evalua na ki momento y pa ki motibo ta utilisa e begrotingsfondsen.
For di e investigacion ta sali tambe na claridad cu ta uza eficiencia regularmente como argumento pa desvia for di proceduranan regular. Algemene Rekenkamer ta constata cu eficiencia ta bay a costo di transparencia y supervision. Eficiencia no por bira mas importante cu transparencia y duna cuenta, pasobra ta hustamente esakinan ta elementonan esencial pa un gobernacion responsabel.
E version digital di e rapport “Buiten beeld, buiten controle” di Algemene Rekenkamer ta publico y disponibel via www.rekenkamer.aw
