Brandweer awo tin cuarenta bombero certifica pa opera ladderwagen
ORANJESTAD – Riba 6 di juli 2026, a tuma luga entrega di certificado na varios bombero cu a finalisa exitosamente e entrenamento pa opera e ladderwagen di Brandweer Aruba.
E curso aki a culmina cu un examen practico y teorico, y segun Comandante di Brandweer Aruba Jair Tromp, e ta satisfecho cu Brandweer Aruba awo tin un grupo grandi di cuarenta bombero certifica pa opera e vehiculo moderno y altamente sofistica aki.
Van nobo pa Brandweer
Riba dia aki tambe Brandweer a ricibi un van nobo na nan Kazerne situa na Tanki Flip.
Durante e ceremonia, Jacobo Winterdal, Sales Supervisor di Garage Cordia Aruba, a haci entrega oficial di e yabi di un van nobo na Husticia, Integracion, Transporte Publico y Energia, mr. drs. Arthur Dowers. Na su turno, Minister Dowers a entrega e yabi na Comandante, Jair Tromp.
E vehiculo nobo ta un Toyota Hiace Commuter cu lo fortalece e capacidad operacional di Brandweer Aruba y ta un necesidad den e trabaonan diario di e cuerpo bomberil.
Inversion den equipo y capacitacion
Minister Dowers a expresa su satisfaccion cu e inversion continuo den capacitacion di e personal di Brandweer Aruba. Pareu cu cuerpo di bombero ta sigui modernisa su flota cu vehiculonan y ekiponan di ultima generacion, ta indispensabel cu e personal tambe haya e conocemento y training necesario pa opera esakinan na un forma sigur y eficiente.
E conocemento aki no solamente ta esencial pa aumenta e efectividad durante operacionnan di paga candela y otro emergencia, sino cu tambe ta contribui na un uzo responsabel di e ekiponan pa preveni daño innecesario como resultado di falta di entrenamento debido.
Cu certificacion di e bomberonan y entrega di e vehiculo nobo, Brandweer Aruba ta sigui fortalece su capacidad operacional y preparacion pa brinda un servicio rapido, sigur y profesional na comunidad.