Bo salud durante vakantie
ORANJESTAD – Temporada di vakantie grandi a yega y hopi ta esnan cu a planea nan vakantie, sea ta un vakantie recreativo, exotico of pa rason medico.
Percura pa bo ta bon informa riba diferente aspecto di e pais cu bo lo bishita, manera e pais su clima, haltura, aspecto di higiena, calidad di awa, e malesanan cu tin den e pais y con pa proteha bo mes di esakinan. Varios ta esnan cu durante di nan vakantie ta confronta problema di salud despues di a come alimento contamina. Esaki por conduci na sacamento, diarea, dolor di stoma y keintura.
Pa e motibo aki Departamento di Salud Publico (DVG) ta conseha pa na momento di come durante vakantie, pa laba man bon prome, come cuminda fresco cushina y no cu a para hopi rato, bebe awa di boter, laba fruta cu awa di boter of come preferibel frutanan cu bo mes mester casca.
Un otro peliger pa e biahero ta insectonan cu ta transmiti malesa den forma di virus of bacteria cu por haci hende malo. Pa evita di keda infecta cu malesa manera Dengue, Chikungunya, Zika of otro, DVG ta conseha pa bisti carson largo, blusa of camisa manga largo y uza repelente contra insecto.
Planea bo vakantie adelanta. Si bo ta sufri di un malesa cronico consulta cu bo dokter prome cu bo biaha y si bo ta uza remedi, percura pa hiba extra. Busca informacion si e pais cu bo ta bay ta exigi biaheronan pa tin cierto vacuna. Pa mas informacion por tuma contacto cu Seccion di Malesanan Contagioso na Departamento di Salud Publico via tel 522-4239 / 522-4241/ 522-4200 of e-mailadres admindbz@dvg.aw.
Ta sumamente importante pa cada biahero cera un seguro di biahe, mirando cu AZV no ta duna cobertura medico den exterior durante vakantie.
Vakantie semper ta dushi y pa mantene asina nos mester tuma medidanan di precaucion.
