Bishita na Stichting Verstandelijk Gehandicapten Aruba (SVGA)

SVGA a keda funda na 1964 pa duna kuido, guia y educacion na hende ku disabilidad intelectual, yudando nan bira mas independiente.

Directora Els van Homelen, team di maneho y esun financiero, como tambe e lidernan di grupo, e personal y e clientenan di e diferente instancianan a ricibi Minister Wyatt-Ras.

A hiba un recorido entre otro na Briyo di Solo, Centro Man na Obra, Pasadia Bibito Pin, Cas Blenchi y a finalisa na Cas Shabururi caminda por a haya un presentacion di con ta traha cu medio cu tin na nan alcance. Proposito di cada bishita, ta di haya un bista amplio di cada departamento.

Minister Wyatt-Ras a express cu den cada centro ta traha cu curason, uno grandi y bunita, caminda ta traha cu pasion dentro di e diversidad cu cada cliente ta presenta. 
Tin reto presente manera gran mayoria di departamento y e intencion ta pa logra den dialogo, conhuntamente cu e directora y cada departamento concerni, pa sigui cu e desaroyo y logra meta y proyecto cu a fiha.

Directora Els van Homelen tambe a duna di su banda palabra di gradicimento pa e bishita di Minister Wyatt-Ras na (SVGA). En berdad e ta importante pa mira cu mesun wowo e trabou cu ta tuma luga na un centro asina.

E contacto personal ta reenforsa e relacion y asina duna miho oportunidad, den forma di dialogo, pa yega na solucion, suprasa reto y logra meta cu tin dilanti.