Bishita di trabao na Warda di Polis na Shaba
ORANJESTAD – Riba 8 di januari 2026, Minister di Husticia mr. drs. Arthur Dowers a haci un bishita di trabao na Warda di Polis na Shaba na unda e haya un recorido for di e Chef di districto di Noord, Inspecteur Raquel Ras.
Ademas Minister Dowers a hiba combersacion breve cu demas funcionario na Shaba, manera e personal di Recherche, Unit Narcotica y demas agentenan presente.
E mandatario di Husticia a pasa inspecciona e cel blok y a hiba combersacion cu algun detenido cu tabata “lucht” na e momento di e bishita. Locual a resalta durante di e bishita ta e estado di e cura di Warda di Polis Shaba, caminda cu tin gran cantidad di auto, brommer y bicicleta confisca cu ta crea situacion no higienico pa e propio polisnan trahando.
Minister Dowers ta lamenta cu un edificio publico cu ta sirbi comunidad tin falta di mantencion tanto riba e edificio mes, pero tambe riba e tereno tur rond cu ta yen di yerba y artefactonan cu no mester ta eyriba.