Bishita di SITA pa fortalece innovacion den proceso di inmigracion na Aeropuerto Internacional Reina Beatrix
ORANJESTAD - Recientemente, Minister di Husticia, Integracion, Transporte Publico y Energia, mr. drs. Minister Arthur Dowers, a ricibi bishita di Sr. Camilo Cardenas, director of Business Development Government Americas di SITA, un lider mundial den solucionnan tecnologico pa sector di aviacion.
Durante e bishita, Sr. Camilo Cardenas a elabora riba e rol di SITA y nan sistema di Advanced Passenger Information (API), cu enfasis riba con innovacion tecnologico por contribui na modernisacion di e proceso di inmigracion na Aeropuerto Internacional Reina Beatrix. E reunion a concentra riba solucionnan moderno, manera gatenan automatisa, boothnan di control, y uzo di biometria, cu e meta pa haci e fluho di pasaheronan rapido, sigur y mas eficiente.
Un proceso di inmigracion moderno y bon structura ta esencial pa Aruba, no solamente pa fortalece siguridad nacional, sino tambe pa eleva e experencia di nos bishitante- y residentenan. Innovacion den inmigracion no ta un luho, pero un necesidad strategico pa un pais cu turismo y conectividad internacional manera Aruba.
Sr. Cardenas a comparti experencia internacional di SITA y ehempelnan di tecnologia di API y biometria implementa exitosamente na diferente aeropuerto rond di mundo, cu respet pa privacidad y den marco legal di cada pais. E cooperacion entre gobierno y sector tecnologico ta vital pa logra solucionnan sostenibel y confiabel.
E bishita aki ta encera un paso importante den e vision di Ministerio di Husticia pa sigui explora oportunidadnan di innovacion y digitalisacion den e cadena di control fronterizo. E meta final ta un sistema di inmigracion moderno, humano y cla pa futuro.
Di parti di Ministerio di Husticia, lo sigui dialogonan strategico cu partnernan internacional pa evalua posibilidadnan concreto cu por beneficia Aruba y su comunidad, semper cu interes di nos pais y siguridad di nos hendenan na prome luga.