Biblioteca ta presenta dos obra traduci na Papiamento: Republica (Plato) y E manual (Epictetus)
ORANJESTAD - Biblioteca Nacional Aruba ta invita publico pa un presentacion di dos buki na Papiamento. Autor Richard A. Frank a traduci dos obra clasico na Papiamento.
‘Republica’ di Plato y ‘E manual’ di Epictetus. Presentacion ta tuma lugar na Biblioteca Nacional Aruba, dia 22 di october 2025 di 6or pa 8or di anochi. Sr. Frank a traduci dos obra clasico cu ainda despues di siglonan ta relevante, impactante y impresionante.
Richard A. Frank, ingeniero kimico naci na Aruba, a traha 33 aña profesionalmente den e industrianan di diseño den ingenieria, operacion di rafinacion di petroleo, maneho di produccion di coriente, y maneho di produccion di awa pa bebe. Na 2024 ingeniero Frank a retira y ta dedicando su mes awo full-time na un di su pasionnan di semper: skirbi creativo, y lesa. Un cambio radical di traha y pensa den un mundo tecnico profesional rigido y exacto pa e exploracion reflectivo y activo di un mundo artistico di imaginacion y expresion literal. Un reto nobo y sumamente interesante.
Frank a publica ‘Essays on balance’ na 2016 y e obra aki ta den Coleccion nacional (Dept. Arubiana) y e autor tambe a publica ‘Light’ na 2021, ‘The Diary of Aloisius Braendt’ na 2022, ‘Twelve Moons’ na 2023 y a skirbi storia pa ‘Antalogia Arubano ’na 2024.
Links:
https://www.bibliotecanacional.aw/pages/essays-on-balance/
https://www.bibliotecanacional.aw/pages/antologia-arubano/