ORANJESTAD - Diahuebs 25 di april 2024, Biblioteca Nacional Aruba a organisa e Sustainable Education Symposium cual tema e aña aki tabata "Ban Planta!" cu e meta pa fomenta un Aruba mas autosuficiente. 

Durante e evento varios orador a hiba palabra, incluyendo Sra. Astrid Britten, Directora di Biblioteca Nacional, Sr. Rendell de Kort di Cornerstone Economics, Sra. Roselinde Barros di Living Soil Agro Consultancy y Sr. Gregory Fung-A-Fat di United Farmers. Cada un a enfoca riba diferente aspecto di plantamento, entre otro, sosten comunitario, cuminda local como parti di nos cultura, impacto ambiental y mucho mas. Hunto cu Santa Rosa a organisa algun charla di Sustainable Education Symposium den siman pa asina studiantenan tambe siña tocante sector primario na Aruba.

Aruba ta dependiente di importacion, cu ta haci nos isla vulnerabel na fluctuacion economico rond mundo. E tema di "Ban Planta" no ta solamente tocante agricultura pero ta representa un compromiso mas amplio pa aumenta resiliencia y siguridad di alimentacion di nos pais contra cambio climatico y incertidumbre economico.

Cada simia planta ta un paso pa sigura nos futuro y ta importante pa combina sabiduria ancestral cu tecnologia moderno pa forma un caminda sostenibel pa Aruba.

Ministerio di Naturalesa ta felicita e ekipo di Biblioteca Nacional, Santa Rosa y tur e participantenan di e simposio, pa nan contribucion den fomenta un cultura di agricultura sostenibel.
 

Biblioteca Nacional a organisa exitoso Simposio di Agricultura Sostenibel