Ban Bek Caya: Un esfuerso positivo pa duna bida nobo na Caya Grandi

E evento ta un iniciativa di gobierno  pa duna bida nobo y trece mas trafico den Caya Grandi na Oranjestad (Caya G.F. Betico Croes).

Ban Bek Caya lo tuma luga diabierna, 6 di juni 2025 for di 6 or pa 10 or di anochi, y lo brinda un ambiente vibrante y familiar pa un y tur. Durante e evento, hopi tienda lo ofrece descuento atractivo, y ta duna e pueblo di Aruba un bon motibo pa sali den famia y stimula e economia local.

E evento ta inclui 6 punto di ambiente cu entretenimento pa henter famia:

• Plaza Daniel Leo: Ataniro, DJ Sky y DJ Devin;
• Plaza La Linda: Tsunami y Shine Music;
• Plaza Pro Fashion: Kids Corner, Dino Jump y musica pa mucha;
• Plaza Nikki Habibe: Banda Chay y un ambiente unico cu Chubato Beer;
• Plaza Djiespies: Banda Proost, caha di orgel “Olga” y baile cultural di “Nos Cultura” y Dazzling Dancers;
• Plaza Comercio: Artesania local den bon ambiente cu NBO.

Comerciantenan ta optimista cu e iniciativa Ban Bek Caya lo trece un multitud di hende den Caya Grandi y lo crea un impulso positivo pa e sector comercial.

Pa Gobierno di Aruba, comercio y organisacionnan local, e mensahe ta cla: revitalisacion di Caya Grandi ta un responsabilidad di nos tur y Ban Bek Caya ta apenas e prome paso den e direccion aki.

Ban sali hunto cu famia y amigonan y disfruta di un anochi inolvidabel den nos Caya Grandi!