Baki den Bario riba 13 di juli na San Nicolas

Baki den Bario ta un proyecto bao coordinacion di Bureau City Inspector, DOW y Serlimar na unda ta pone un cantidad di baki grandi na un sitio den cual e habitantenan di e bario por trece nan desperdicio residencial y deshaci di esakinan na manera responsabel. 

Despues di e exitoso Baki den Bario cu a tuma luga pariba di Watertoren na San Nicolas, e habitantenan a haci un peticion na Gobierno pa trece Baki den Bario un biaha mas mirando cu hopi habitante no a haya e oportunidad pa deshaci di nan desperdicio durante e accion di Baki den Bario. E biaha aki, lo pone e bakinan grandi di sushi, riba e veld dilanti di Botica Centro Medico / Pit Stop Restaurant situa den Bernhardstraat. 

Sr. Maikel Gomez, vocero di Bureau City Inspector a informa cu comunidad di San Nicolas y vecindario por deshaci di nan desperdicio residencial for di tempran di mainta, 7:00 AM te cu 11:00 AM. E entrada pa yega na e bakinan di desperdicio ta via e caminda di Zeewijk. Lo tin control na entrada y salida pa asina garantisa un bon fluho di trafico y pa matene ordo. Esnan cu lo trece desperdicio mester tene bon cuenta cu no ta permiti trece ni azeta bieu ni asbest, pero tampoco sushi comercial. 

Sra. Natalie Wolff, vocero di Serlimar tambe a haci un yamada na comunidad pa yega diadomingo awo. Ta importante pa separa desperdicio na cas caba y asina facilita y agilisa e proceso pa asina mes hende por haci uzo di e oportunidad aki. Lo tin diferente container entre otro pa mata y artefacto di metal, pero tambe pa palo y desperdicio general.

Representante di Ministerio di Naturalesa, sr. Chris James a haci un apelacion na e comunidad di pariba di brug y vecindario, pa no perde e oportunidad di e accion aki. E prome edicion a resulta den uno exitoso caminda e comunidad di pariba a haci bon uzo, pa di manera gratis, deshaci di tur desperdicio den cura. 

Tin un necesidad grandi pa tipo di iniciativanan manera Baki den Bario, mirando cu desde cu a cera e dump na Parkietnbos, e sitionan asigna pa hiba desperdicio residencial ta limita pa den siman y pa hopi e ta impagabel. E ekipo dinamico di Baki den Bario ta responde debidamente na e yamada di comunidad y ta pone bakinan den bario strategicamente pa yega na e meta comun, un Aruba limpi y dushi pa biba.