Baki den Bario a continua na San Nicolas
ORANJESTAD - Baki den Bario ta iniciativa cu a lanta despues cu a cera e dump y gobierno ta continua cu accion di limpieza aki pa alivia e situacion di sushedad acumula na cas.
Despues di e prome Accion di Bario na Noord, a mira realmente e necesidad pa tipo di iniciativanan asina. Tin un problema structural di acumulacion di desperdicio manera sofa, colchon, television, frigidaire y stoof bieu, cu ta keda acumula den cura di cas mirando cu pa gran mayoria, e servicio di tira sushi grandi afo ta impagabel. E cantidad di baki grandi di sushi cu a yena cu desperdicio den un caya manera Semeleerstraat ta duna indicacion di e embergaduro di e problema aki.
Pa tal motibo, diasabra 31 di mei, 2025 Prome Minister di Aruba mr. Mike Eman, hunto cu Parlamentario Otami Thomasia y personal di Bureau City Inspector, Serlimar y Ecotech a coordina henter e proceso di deshaci di desperdicio domestico di manera eficiente. A percura pa separacion di sushi y den apenas dos ora, ya a hiba 18 baki grandi completamente yen pa nan respectivo destino pa procesamento.
Ya pa 6'or y mey di mainta, a forma un rey largo di pickup yena cu sushi riba e caminda entre Theresita Center y Caya Corsou. Un gran cantidad di ciudadano di tur skina di San Nicolas a yega cu nan desperdicio cu tin algun tempo ta acumulando den cura di cas, pa motibo cu e prijsnan di baki grandi pa tira sushi afo a bira impagabel despues cu e cera dump na Parkietenbos.
Gobierno ta analisando e posibel solucionnan pa di manera structura, duna comunidad e espacio pa deshaci di nan desperdicio di manera pagabel y sostenibel. Ta anticipa cu na final di e accion di Baki den Bario na San Nicolas pa 11'or y mey, alrededor di 500 pick up completamente yen lo a deshaci di nan sushedad.