Awe, 2 di februari 2026, ta ultimo dia pa haci pago di impuesto di vehiculo di motor 2026.

Tene cuenta cu no tin cambio di fecha. Nos ta pidi tur contribuyente pa haci e pago na tempo; ainda tin chens. 

Tarifa

E tarifa no a cambia. Pues, si no tin cambio di vehiculo, ta paga mesun tarifa di impuesto cu aña 2025. Contribuyentenan cu no ta corda e suma cu mester paga, por consulta e comprobante di registracion di vehiculo. E app 'BO impuesto' no ta den funcion mas.

Paga via online banking 

Debi cu tur nos oficinanan ta sumamente druk y e tempo di espera ta largo, nos ta recomenda fuertemente pa haci e pago online via banco awe prome cu 12 or di merdia. Ta importante pa e pago pasa riba nos cuenta cu e fecha di awe. Esnan cu ta paga parti atardi ta core e risico cu e pago ta pasa riba nos cuenta cu fecha di 3 di februari. Den e caso ey, e boet ta aplicabel. 

Scoge e opcion Bill Payment y despues "DIMP - Motorrijtuigbelasting". Skirbi den e descripcion persoonsnummer, number di auto y periodo por ehempel: 12345678, A-99500, 2026.

Despues di haci pago por pidi e recibo online via impuesto.aw. Riba e pagina principal di nos website tin informacion di esaki y e numbernan di cuenta di banco.

Unicamente pago awe

Awe nos servicio di caha ta unicamente pa e contribuyentenan cu mester haci pago. Pa e motibo aki nos no ta brinda e servicio di registra vehiculo awe. Pa esnan cu mester entrega plachi di number, mester acudi na Camacuri, na oficina unda ta busca plach'i number.

Boet

Entrante mañan, 3 di februari, e boet pa incumplimento ta aplicabel automaticamente. E boet ta 50% di e suma di impuesto. Por ehempel: suma di impuesto di mita aña Afl. 150. Boet: Afl. 75. Total pa paga Afl. 225. Evita gasto extra. 
Cumpli na tempo!