Aumento di bijstand pa personanan cu limitacion

E surplus alcansa den e presupuesto di 2024, a crea espacio financiero pa yuda diferente grupo den nos comunidad manera e pensionadonan, empleado publico y diferente fundacion cu a haya indexering, pero tambe a tene cuenta cu e grupo cu limitacion.

Den historia di bijstand pa esnan cu limitacion, apenas na tres ocasion esaki a conoce un aumento, na 2004, 2007 y na 2013. Entrante 1 di juli 2024, e bijstand pa esnan cu limitacion lo aumenta cu 130 florin cu ta suma un total di 1080 florin pa luna. Lo paga e aumento di 130 florin cu forsa retroactivo te cu juli 2024, pues ademas di cobra 1080 florin september, lo cobra e 130 florin di aumento di juli y augustus 2024.