Atleta Ethan Westera bon ricibi na Aeropuerto
ORANJESTAD - Diahuebs 22 di augustus 2024, Minister di Enseñansa y Deporte, Endy Croes, hunto cu Secretaria General di Comite Olimpico Arubano (COA) Nicole Hoevertsz, miembro di Direccion di Deporte di COA Sr. Jonathan Wever, famia y amistadnan, a acudi na Aeropuerto Internacional Reina Beatrix pa ricibi atleta olimpico Ethan Westera.
Ethan Westera di 26 aña, a representa Aruba den Windsurf Olimpico 2024 na Marseille, Paris y keda na di ocho luga, unda a competi cu un total di 24 pais. Posicionando su mes den e top 8 den e mundo olimpico, Ethan como e prome atleta Arubiano, a ricibi un diploma Olimpico.
Na 2023, Ethan a participa den Weganan Panamericano y a conkista medaya di plata y asina a clasifica pa Olimpiada di Paris 2024. Na un edad hopi hoben, Ethan a cuminsa practica e deporte di windsurf y a representa Aruba den varios competencia internacional.
Ethan ta sumamente satisfecho cu e experencia durante Weganan Olimpico y mas aun cu su logro. Secretaria general di COA Nicole Hoevertsz a indica cu e competencia di windsurf aki tabata uno espectacular y ta hopi orguyoso di Ethan cu a conkista e di ocho luga.