A.T.A. y AAA a presenta actualisacion importante di Aeropuerto

E momento importante aki a sirbi como un plataforma esencial pa fortalece colaboracion y pa sigura cu e partnernan ta informa di e desaroyonan di e futuro di nos isla. Un total di 103 persona procedente di Merca, Canada, Colombia, Brazil, Argentina, Chile, Pero, Equador y Paraguay, Hulanda, Italia y Alemania ta na Aruba pa e occasion aki. Esaki ta inclui representantenan di nos hotelnan, estableci den exterior, como tambe diferente miembro di ekipo di A.T.A. y prensa internacional.

Durante di e evento na Aruba Airport Authority (AAA), CEO di Aruba Tourism Authority, Ronella Croes, a yama bonbini na esnan presente y a duna un presentacion di e proyecto Gateway 2030 na ‘Tour Operators’ y aerolineanan internacional, mirando cu esaki tin un influencia directo na e experiencia di biahe di nan cliente. Cu e amplacion di capacidad y mehoracion substancial den e infrastructura di aeropuerto, huespednan lo por spera un proceso mehora cu lo añadi na un experiencia positivo.

Chief Revenue Development &Communications Officer & Interim Management Team Member di Aruba Airport Authority (AAA), Sra. Barbara Brown, a presenta Fase 1ª di e proyecto Gateway 2030. A pone enfasis riba e futuro di e aeropuerto, compartiendo informacion riba e sala nobo pa check-in pa pasaheronan di Merca, un programa cu lo inicia operacion den comienso di 2025 y cu eventualmente lo conta pa tur otro pais. Ademas a presenta e sistema di maneho di maleta ‘Baggae Handling System’ di ultimo tecnologia. Gateway 2030 ta un inversion grandi cu ta redefini e hospitalidad y comodidad pa nos pasaheronan. AAA ta compromete pa eleva e experiencia y e eficiencia operacional di e pasaheronan, cual ta haci Aruba un destinacion di biahe di primera clase. Esaki ta un iniciativa transformativo cu ta refleha e dedicacion di e aeropuerto pa duna un experiencia di biahe sin interupcion na tur bishitante.

E evento aki a subraya e compromiso continuo di Aruba pa cu innovacion y sostenibilidad, sigurando cu e huesped ta sigui disfruta di un experiencia di biahe sin obstaculo. Pa e ‘Tour Operators’ y aerolineanan, y representantenan di prensa internacional presente, e informacionnan aki ta duna balor adicional cu lo yuda nan promociona Aruba na manera mas eficaz globalmente, mientras cu ta apoya practicanan di turismo sostenibel.