A.T.A. ta presenta resultado di september y su Responsible Tourism Impact Report
ORANJESTAD - Aruba Tourism Authority (A.T.A.) a publica “Responsible Tourism Impact Report” como parti di e rapport mensual di A.T.A. pa e luna di september 2025, resaltando e actitudnan di biaheronan mundial pa cu sostenibilidad y e ultimo resultadonan turistico pa Aruba.
Segun e rapport 96% di biaheronan mundial ta mira e importancia di turismo responsabel. 80% ta kere cu turismo mester mehora bida di comunidad local, mientras 73% ta expresa deseo pa laga un impacto positivo durante nan biahe. Mester menciona cu solamente 23% ta sinti cu nan a haya suficiente guia di industria pa logra esaki.
E resultadonan di e rapport ta mustra tambe cu 74% ta preocupa pa efecto di cambio climatico riba destinacionnan di isla manera Aruba, y 66% ta pone acceso na naturalesa como un factor principal den seleccion di destinacion.
E resultadonan ta confirma cu turismo responsabel y sostenibel ta un prioridad mundial, y A.T.A. ta compromete pa sigui integra turismo cu impacto positivo den su strategia y vision pa futuro.
ESTADISTICA CONFORME ACTUALISACION DEN E INDUSTRIA DI TURISMO:
CRECEMENTO DI 2.6% DEN STAYOVER PA SEPTEMBER 2025 COMPARA CU SEPTEMBER 2024
Durante september 2025, Aruba a ricibi un total di 97,778 turista stay-over, representando un crecemento di 2.6% compara cu september 2024. Esaki ta un aumento absoluto di 2,493 bishitante. E aumento mas notabel a bini for di mercado Latino Americano, particularmente Argentina cu un crecemento di 239.6% y Brasil cu 72.8%. For di Norte America, Canada a logra un crecemento fuerte di 14.7%.
MERCADONAN Y PARTICIPACION DI E MERCADO
Pa september 2025, e distribucion di e bishitantenan na Aruba ta lo siguiente:
- 69.9% for di Norte America
- 21.7% for di Latino America
- 5.3% for di Europa
- 3.1% for di otro region.
E crecemento sobresaliente for di Latino America ta principalmente stimula pa Argentina y Brasil. Aunke Europa a mustra un caida leve, Canada a logra un aumento notabel den yegadanan for di Norte America.
SHORT-TERM VACATION RENTALS (STVR)
A.T.A. ta sigui utilisa e plataforma Lighthouse pa monitorea y analisa e sector di STVR.
Si compara september 2025 cu september 2024:
- E nivel di ocupacion promedio a subi pa 52%
- E ADR (Average Daily Rate) pa september 2025 ta USD $280
Ingreso total YTD te cu september 2025 ta USD $239.4 miyon, compara cu USD $189.5 miyon na september
2024.
A.T.A. ta keda comprometi na fomenta crecemento turistico sostenibel mientras ta percura pa Aruba sigui prospera como un destinacion responsabel y resiliente cu ta beneficia tanto e bishitantenan como e comunidad local.